Charter Document - 00910398
| Charter Number: | 00910398 |
|---|---|
| Cartulary Title: | The Cartulary of the Abbey of Eynsham |
| Charter Language: | Latin |
| Charter Origin: | Religious |
| Charter Type(s): | Agreement |
| Date: | 1267 |
| Date type: | Assigned |
| Resource Link(s): |
Bodleian Library - Christ Church MS 341 (f91r) |
Charter:
Omnibus Christi fidelibus ad quos presentes littere peruenerint R miseracione diuina Lincolniensis episcopus salutem in domino sempiternam Ad uniuersitatis uestre noticiam uolumus peruenire quod cum dilecti in Christo filii abbas et conuentus de Egnesham ecclesiam de Northone Brun in qua ius patronatus habere noscuntur necnon decimas quas de dominico nostro infra limites prebendalis ecclesie de Thame percipiunt seu percipere consueuerunt pure simpliciter et absolute nostre uoluntati submiserint et ordinacioni nos intellecti quod dictum monasterium temporalium rerum inopia sit depressum ideoque specialius quod de patronatu nostro existit indigenciis ipsius teneamur pie subuencionis remedio obuiare competenti tractatu et prouida deliberacione prehabitis de predicta ecclesia et decimis memoratis diuino intuitu in hunc modum auctoritate pontificali duximus ordinandum uidelicet quod predicti abbas et conuentus ad hospitalitatem habundancius exhibendam ecclesiam supradictam de Northone Brun cedente uel decedente ipsius rectore in proprios usus retineant eiusque prouentus et redditus in usus huiuscemodi licent[er] conuertant salua competenti uicaria cum eos dictam ecclesiam optinere contigerit per nos et successores nostros taxanda et ordinanda decimas uero quas infra limites prebendalis ecclesie de Thame contra ius commune percipiunt ad antiquum statum reducimus et eas predicte ecclesie de Thame perpetuo exnunc consolidamus ita tamen quod canonicus predicte prebende de Thame qui pro tempore fuerit soluat sepedictis abbati et conuentui ad Nathale Domini xii marcas argenti pro decimis supradictis quousque dicti religiosi fructus et prouentus supradicte ecclesie de Northone Brun libere fuerint assecuti Ad quam prestacionem xii marcarum in forma predicta prenominatam prebendam de Thame de consensu et uoluntate magistri R de Mapham rectoris ipsius constituimus obligatam saluis in omnibus episcopalibus consuetudinibus et Lincolniensis ecclesie dignitate In cuius rei testimonium presentibus litteris sigillum nostrum apponi fecimus et sigillum magistri R de Mapham prenominati in testimonium consensus sui est appositum