Charter Document - 00910298

Innocencius episcopus seruus seruorum dei dilectis filiis de Abendona et de Oseneya abbatibus Sarisbiriensis et Lincolniensis dioces[um] salutem et apostolicam benediccionem Paci et tranquillitati dilectorum filiorum abbatis et conuentus monasterii de Egnesham ordinis sancti Benedicti Lincolniensis diocesis paterna uolentes in posterum sollicitudine precauere eis per nostras litteras duximus indulgendum ut ad recepcionem uel prouisionem alicuius in pensionibus uel aliis ecclesiasticis beneficiis per litteras sedis apostolice uel legatorum ipsius impetratas per quas non sit ius alicui acquisitum uel etiam impetrandas cogi ab aliquo non ualeant absque speciali mandato sedis eiusdem faciente plenam et expressam de huiusmodi indulgencia mentionem Quocirca discrecioni uestre per apostolica scripta mandamus quatinus dictos abbatem et conuentum non permittatis contra concessionis nostre tenorem super hiis ab aliquibus indebite molestari molestatores huiusmodi per censuram ecclesiasticam appellacione remota compescendo non obstante si aliquibus sit indultum quod interdici suspendi uel excommunicari non possint per litteras apostolicas nisi expressam fecerint de indulto huiusmodi mencionem Quod si non ambo hiis exequendis poteritis interesse alter uestrum ea nichilominus exequatur Data Asisii iii kal Augusti pontificatus nostri anno xi