Charter Document - 00910197
| Charter Number: | 00910197 |
|---|---|
| Cartulary Title: | The Cartulary of the Abbey of Eynsham |
| Charter Language: | Latin |
| Charter Origin: | Religious |
| Charter Type(s): | Agreement |
| Date: | 1215 - 1223 |
| Date type: | Assigned |
| Resource Link(s): |
Bodleian Library - Christ Church MS 341 (f50r) |
Charter:
Hec est conuentio facta inter dominum A abbatem et conuentum Egneshamie et Robertum le Grant de Finestok scilicet quod predicti abbas et conuentus tradiderunt et concesserunt predicto Roberto terram suam de Finestok cum quodam assarto quam deliberauerunt de manibus Roberti Arsic et Petri Staninges quam ipsi habuerunt et tenuerunt occasione quarumdam conuentionum inter eos factarum habendam et tenendam illi et heredibus imperpetuum de predictis abbate et conuentu libere quiete pacifice integre reddendo inde annuatim dictis abbati et conuentui quatuor solidos sterlingorum ad quatuor anni terminos uidelicet ad festum sancti Thome apostoli xii denarios ad Annunciacionem beate Marie xii denarios ad Natiuitatem sancti Iohannis Baptiste xii denarios et ad festum sancti Michaelis xii denarios pro omnibus seruitiis et omnibus exactionibus dictis abbati et conuentui pertinentibus saluo seruitio domini regis scilicet quantum pertinet ad uicesimam partem unius militis ita tamen quod nec Robertus nec eius heredes aliquid de predicta terra dabunt alicui in feodum uel ad firmam perpetuam tradent uel inuadiabunt aut uendent aut aliquo alio modo alienabunt nisi dictis abbati et conuentui uel per ipsorum licentiam et uoluntatem Et predictus Robertus et heredes sui conseruabunt supradictos abbatem et conuentum et omnes suos per omnia acquietabunt uersus dominum regem et dominum Falcasium de plegiagio quod factum fuit uersus dominum Falcasium pro deliberatione eisdem terre quando saisiata fuit in manu domini regis et in manu domini Falcasii ita quod nec abbas et conuentus nec Petrus clericus abbatis uel eius plegii aliquod dampnum incurrent uersus aliquem pro illa terra Preterea memoratus Robertus concessit et confirmauit pro se et heredibus suis memoratis abbati et conuentui excambium quod fecit cum magistro P de prato suo ex utraque parte de Teppewelle cum orto adiacente pro domo Lewrich et quadam parua purprestura quas predictus P sibi concessit sicut continetur in carta quam idem P habuit de eo liberum et quietum imperpetuum secundum formam et tenorem memorate carte sue Item idem Robertus obligauit se et heredes suos per hoc cyrographum suum quod de cetero fideles existent dictis abbati et conuentui in omnibus et precipue de predicto seruitio fideliter faciendo ita quod nisi de dicto seruitio et aliis rebus eis debitis fidelitatem eis seruauerint libere capient dictum tenementum in manus suas sine spe quod dictus Robertus nec eius heredes umquam aliquid inde recuperent Et pro hac tradicione et concessione dedit dictus Robertus dictis abbati et conuentui quadraginta solidos sterlingorum Hec autem fideliter obseruanda pro se et heredibus suis memoratus Robertus tactis sacrosanctis iurauit Et in huius rei testimonium tam abbas et conuentus quam supradictus Robertus huic scripto signa apposuerunt Hiis testibus Iohanne portario domino Willelmo Blundo Auenello Waltero de Submuro Ricardo de Submuro Roberto Marescallo Hernaldo Frankel[ano] et multis aliis