Charter Document - 00910005

Mediator Dei et hominum homo Christus Iesus sponsam suam sanctam uidelicet ecclesiam uariis enigmatibus ab ipso mundi exordio prefiguratam sibique salutari lauacro unitam ac demum proprii lateris e cruce manente sacramento prorsus federatam ob nimiam dilectionis caritatem dilatari ac magnificari uolens nonnullis sanctorum precedentium patrum exemplis qualiter id fiat fidelibus suis hortando creberrime insinuat Necesse ergo est omnes eandem agni sponsam summique regis filiam necnon perfectam cunctarum gentium matrem iuxta prolata patrum exempla animo sullimare gestientes sic erga eam fideliter agant ut sponsi immortalis dextre assistens uesteque deaurata fulgens non eos quasi adulterinos uel criminum feditate circumdatos indignanter abiciat uerum ut filios adoptiuos ab intemerato utero productos ac liquido sacrorum uberum nectare educatos respiciendo gratulanter aluisse se gaudeat Et quamquam hec sollicitudinis cura cunctis fidelibus necessario indicatur rectoribus tamen eiusdem matris nostre qui ei propagandi gratia non tam preesse quam prodesse diuinitus constituuntur pre cunctis specialius congruit quos quidem tota mentis integritate niti decet ut cuius fluuiali fecunditatis aluo renati cuiusue sacramentis salutaribus delibuti sunt eam temporaliter dotare temporalibusque donariis ditare et decorare diligenter studeant quatinus cum magni dies examinis repentinus ingruerit immortalitatis stola decorari atque inopinata sanctorum remuneratione eiusdem immortali sponso largiente cum legitime certantibus eternaliter ditari mereantur Cuius quidem inestimabilis premii uasto cordis conamine consors fieri gestiens et ut illud nancisci feliciter merear satagens ego Remigius sancte Lincolniensis ecclesie pontifex ob temporalem domini mei gloriosissimi regis Anglorum Willelmi uidelicet secundi propriique corporis mei atque omnium michi subditorum prosperitatem necnon eternam utriusque domini mei patris siquidem et filii domine quoque mee dulcissime Mathildis regine animeque mee egentis ac utriusque mei parentis et ut prefixum est omnium michi commissorum salutem ecclesiam sancte Dei genetricis et perpetue Uirginis Marie in loco qui uulgo dicitur Stowa quondam prolixo temporis spatio presidentium incuria desolatam reformare decerno ibique memorati domini mei uictoriosissimi regis Anglorum Willelmi filii uidelicet precellentissimi regis Willelmi precedentis necnon omnium episcoporum et abbatum ceterorumque optimatum totius regni sui auctoritate Columbanum uirum uenerabilem sacrisque exercitiis haud modice cluentem abbatem cum monachis sibi regulariter subditis inuiolabiliter constituo cui etiam possessiones uniuersas sibi olim ob diuine pietatis amorem a clarissimo consule Leofrico et ab eiusdem deuotissima coniuge Godgiua collatas Brantonam scilicet et duas portiones Guelleguapentac cum omnibus sibi pertinentiis Newercham quoque ac Flatburch cum uniuersis sibi adiacentibus perpetuo concedo presentisque pagine testimonio indissolubiliter corroboro Et ut ipsa Dei genitrix et unica Uirgo Maria filio suo unico largiente me fontem uite sitientem ab spe ad speciem transferat quo regem in decore suo cernere merear quecunque in ipso capite prenotate pontificalis mansionis in qua prefata sita est ecclesia iuris episcopii hactenus extiterant oblationem scilicet illius ecclesie altaris et terram ibidem quatuor aratrorum ceteraque que [] memini episcopatui iure debebantur prefate ecclesie celorum regine dudum dicate ad eiusdem scilicet instaurationem et ad usum fratrum inibi Deo militantium beneficia prolata accumulando simili modo perhenniter possidenda attribuo et attributa inuiolabiliter affirmo Et ne posteri mei diebus uite mee finitis anime mee detrahentes episcopatum me temere minuisse uel suis quocunque modo rebus exspoliasse asserant possessionem quandam immanissimis a me laboribus uindicatam Slatfort scilicet pagum quendam perpulcrum michi nempe michique Christo iubente succedentibus aptum ac ualde necessarium cum cunctis rite attinentiis pro supramemoratis stipendiis episcopatui sublatis tam michi quam successoribus meis in episcopatum commutationem perhennem restituendo redintegro firmiterque stabilio Addo etiam preterea eidem gloriosissime Dei genetricis ecclesie sibique famulantibus monachis augmentum quoddam insigne [ecclesiam] Egneshamensem cum eodem pago in quo antiquitus construitur ceterisque sibi membris adherentibus Scipfort scilicet et Rollendricht necnon erdintona atque Micletuna quadam quoque ecclesiola sancte ebbe in urbe Oxenefordensi consita cum reculis sibi deuotione pia fidelium collatis atque etiam duobus molendinis secus eiusdem urbis aquarum decursus pridem erectis cum uniuersis quoque iure sibi appendicibus supradicto modo perpetualiter optinenda annuo strictimque connecto Huius itaque constitutionis atque inuiolabilis mee donationis serie taliter explanata non solum a me concessa et attributa presentique cartule iam inuiolabiliter inserta uerum etiam quecunque in futuro pia fidelium largitione uindicari poterunt sepissime memorate Christi matris ecclesie cui omnia prelibata sunt necnon pie memorie patri supradicto Columbano uidelicet Abbati suisque successoribus ibidem canonice imperpetuum promouendis iure perhenni cum omnibus consuetudinibus presidenda concedo et concessa sub Christi et totius ecclesie testimonio presentisque cirographi assertione pontificali auctoritate constanter consolido propriaque manu consigno Et ne antiqui hostis instinctu conscripta constitutionis mee donaria in posterum a quolibet perditionis filio frustentur sed potius rata et solida habeantur eidem sacratissime uirginis ecclesie talem eternaliter libertatem largior ut nullus mortalium elationis tumore debriatus dominationem aliquam in eam exerceat excepto Lincolinensi nostre uidelicet ecclesie sedis antistite cui cum suo pastore quicumque sit ceterisque sibi beneficiis ob multorum fidelium animarum remedium impensis iuxta ueterum patrum traditionem utpote domino immo ut conditori in eternum subiacebit a quo etiam honoris donationem et sacri ordinis consecrationem secundum canonum censuram adepturus est qui sic tamen ei pie et paterne presit ut nunquam tributum uel quemlibet redditum inde exigat seu tesseram necessitate aliqua ingruente sibi imponere presumat uel etiam consuetudinem quamlibet aliam ab ea extorqueat sed potius eam ab hostium infestatione muniat ut in die retributionis arbiter orbis mitissima Genitricis sue supplicatione sibi large retribuat Si quis autem in futuro quod absit tocius bonitatis inimico machinante huic salutifere constitutioni nostre mente sacrilega fraudulenter obuiauerit meamque hanc saluberrimam donationem tot tantorumque procerum sanctione roboratam auaritie ueneno repletus minuere uel delere uiolenter presumpserit deleatur de libro uiuentium et cum iustis non scribatur sed tanquam puluis quem proicit uentus a facie terre ne gloriam dei uideat cum impiis tollatur sitque iuxta apostolum anathema maranatha nisi resipuerit et deo sancteque ecclesie quam fraudulenter leserit digne satisfecerit Amen Anno ab incarnatione Christi millesimo lxxxxi indictione xiiii anno iiii regni inclitissimi principis Anglorum Willelmi secundi pontificatus autem Remigii Lincolinensis episcopi anno xxiiii