Charter Document - 00910001

Dominante per secula infinita omnium dominatore Christo saluatore nostro uniuersitatisque creatore Ethelredus gratia Dei eiusque misericordia rex et rector regni Anglorum et deuotus sancte Ecclesie defensor humilisque adiutor omnibus ecclesiastice pietatis ordinibus seu secularis potentie dignitatibus in Christo domino pacis et beatitudinis premia Considerans pacifico pie mentis intuitu cum bona uoluntate una cum Dei sacerdotibus et consiliariis nostris iram plus solito seuientis Dei in nos eum placare cum continua bonorum operum exhibitione et ab eius laudibus nunquam desistere decreui Et quia in nostris temporibus bellorum incendia direptionesque opum nostrarum patimur necnon et uastantium crudelissima depredatione hostium barbarorum paganorumque gentium multiplici tribulatione affligentiumque nos usque ad internitionem tempora cernimus incumbere periculosa nos in quos fines seculorum deuenerunt nimium conuenit de nostrarum utilitatibus animarum cura diligenti perscrutari qualiter quibusque meritis in seculo iam futuro cum auctore omnium Christo sint uicture quia non enim [ut apostolus ait] hic habemus mansionem sed futuram inquirimus et ideo magna nobis incumbit necessitas cum terrenis diuitiis futuram totis inquirere uiribus Nostre siquidem diuitie nisi comminute in plures nobis prodesse nequaquam possunt nullus enim tam composite felicitatis constat ut non ea que possidet uel sponte siue nolens amittat et ideo multis humane felicitatis dulcedo amaritudinibus respersa est Que etsi ad tempus fruenti iocunda esse uideatur finem tamen amaritudinis semper introducet Duo quippe sunt quibus omnis humanorum actuum constat effectus uoluntas scilicet et potestas quorum si alterum desit nichil est quod explicari quis queat uoluntate autem deficiente ne aggreditur quidem quisque quod non uult ac si potestas desit uoluntas omnino necesse est ut frustra sit Sed boni quique recta uoluntate et optima potestate adipiscuntur bonum quod adappetunt quia per temporalia huius euanescentis uite negotia eterna sibi futuri calce carentis seculi premia mercantur sine fine mansura Quapropter ego Ethelredus multiplici Dei clementia indulgente Angul Saxonum antedictus rex ceterarumque gentium longe lateque per circuitum adiacentium gubernator et rector michi insitum uideo et uelle et posse et ideo memorie presentium et etiam futurorum sequentium post nos ueracibus litterarum apicibus insinuare curaui quod Ethelmaro uiro ualde fidelissimo michi quoque dilectissimo impetrante absolutissimum libertatis priuilegium constituo monasterio eius in honore sancti saluatoris omniumque sanctorum suorum iure dedicato in loco celebri iuxta fluuium qui uocatur Tamis constituto quod ab incolis regionis illius Egnesham nuncupatur uocabulo Quod quidem monasterium Ethelmarus ab Ethelpeardo genero suo mutuando accepit et pro illis triginta mansiunculis dedit triginta sex mansiones tribus diuisas in locis tres uidelicet in Upoteri et decem in Litlan Cumtune decemque in Lellincge et tresdecim in Scyldforda Uite igitur regularis monachos inibi constituens ipse patris uice fungens uiuensque communiter inter eos abbatem sancte monachorum congregationi preferre se uiuente instituit ut ita deinceps post ipsum quem constituit abbatem abbatum electio secundum regule preceptum ex eadem congregatione usu teneatur perpetuo id est ut ex eadem congregatione qui ordinandus est et aliunde nequaquam nisi peccatis promerentibus uel impediente imperitia talis qui dignus sit in ea repperiri nequiuerit cum regis consilio eligatur Rex autem non ad tirannidem sed ad munimen loci et augmentum uti mos est super pastorem et Christi gregem dominium sollerti uigilantia misericorditer custodiat Secularium uero quispiam ne ad magni detrimenti ruinam deueniat ut dominium loci teneat excepto rege nunquam eligatur Sunt etenim rura hec que sancto saluatori omnibusque sanctis eius uir prefatus Ethelmarus et divine seruitutis obsequio et magna cum humilitate non solum a Rege sed etiam a diuersis hominum personis nunc comparando nunc mutuando optinuit que ad usus monachorum inibi degentium eterno concessit donario Quinque uidelicet manentes in loco ubi ab indigenis Sceaptun dicitur Uillam quoque que Scipford dicitur dedit uir predictus ad monasterium antedictum quam ei Leofpinus suus consanguineus spiritu in ultimo constitutus donauit quam Birhtnotus ante dux preclarus ab Eadgaro patre meo dignis premium pro mentis accipere letabatur Micclantun similiter ad monasterium dedit quam ille Byrhtnothus dux predictus ultimo commisit dono ab Eadgaro quoque ei ante donatam et in kartula firmiter commendatam Terram quoque quinque manentium que Burtun dicitur donauit quam a me promeruit et ab Ethelpeardo genero suo uoluntatem ante accepit pro remedio anime uxoris sue Emit quoque predictus uir Ethelmarus a me cum triginta libris duodecim mansiones de uillulis quas matrona quedam nomine Leoftset suis perdidit ineptiis et amisit tres semis uidelicet manentes set Maranacliue quas pari modo ad monasterium dedit duas similiter mansiones et Beonetlege silue communis dedit Donauit etiam uir sepenominatus quinque mansas set Stodlege et decem set Cestertune propinquo suo nomine Godpino pro decem mansionibus terre communis que set Erdintune dicitur quas quoque predicto monasterio commisit Dedit quoque Byrthtelmus quondam episcopus Ethelpeardo propinquo suo patri uidelicet Ethelmari uiginti mansiones ubi ab incolis et Escseron dicitur quas Ethelperdus filio suo Ethelmaro longe ante mortem suam donauit et ille supradictas mansiunculas ad monasterium dedit Terram similiter que Dictun dicitur quam a me promeruit kartula confirmatam monasterio antedicto donauit Rus quoque quod Rameslege dicitur et portum ad se pertinens quod illi Wulfwyn propinqua sua in ultimo constituta spiritu commisit monasterio predicto concessit Sit igitur monasterium predictum ab omni humane seruitutis iugo liberum cum omnibus supradictis uillulis ad se rite pertinentibus expeditione excepta et pontis arcisue constructione Si quis igitur hoc nostre libertatis donum confirmare et firma uoluntate stabilire et amplificare satagerit augeat amplificetque ei deus omnipotens in seculo presenti prospera cuncta et in futuro felicitatis tripudium Qui uero in aliud euertere et nostre libertatis munimen destruere uoluerit sit ipse alienatus a sancte Dei ecclesie consortio necnon et a participatione sacrosancti corporis et sanguinis Christi et in magni iudicii die cum Iuda Christi proditore sinistra in parte condemnatus nisi hic prius digna satisfactione humilis penituerit quod contra nostra decreta deliquit