Charter Document - 00900309

Cum mota esset contentio super divisis inter Whiteby manerium Abbatis et conuentus Cestrie et Staneye manerium Abbatis et conuentus de Stanlawe super bruera inter dictam villam et diuisas inferioris ville de Staneye iacente inter dictos Abbatem et conuentum Cestrie per breue de rationabilibus diuisis petentes et dictos Abbatem et conuentum de Stanlawe defendentes tandem dicta contentio in crastino Epiphanie anno regni regis Edwardi sexto ad instantiam nobilis viri domini Henrici de Lascy comitis Lincolnie et constabularii Cestrie conquieuit in hunc modum videlicet quod dicti Abbas et conuentus Cestrie elegerunt sex liberos et legales homines do vicineto Cestrieshirie scilicet dominum Patricium de Haselwall militem Philippum de Benuille Robertum de Pulle Willelmum de Brexen Willelmum de Bulkelegh et Ricardum de Mascy de Moreton et Abbas et conuentus de Stanlawe totidem elegerunt videlicet dominum Rogerum de Douneuille Alexandrum de Benuille Willelmum Lancel[yn] Bertramum de Meeles Gydropum de Millyngton Robertum de Brescy Qui quidem xii de expresso consensu partium elegerunt et associauerunt sibi tertium decimum scilicet Ricardum de Mascy tunc vicecomitem Cestrieshirie qui omnes in presentia domini Guncelini de Badelesmere tunc Justiciarii Cestrie iurati dixerunt et per sacramentum suum recognouerunt quod recte diuise inter manerium de Witeby et Staney in bruera extendunt se ab antiquis diuisis inter campos arabiles dictorum maneriorum directe ex transverso uersus occidentem usque ad quamdam viam communem que se extendit a villa de Witeby uersus Cestriam subtus Cochull quam viam vocabant Le Portwey et sic sequendo illam viam per foueas per ipsos iuratos factas usque ad quemdam sichetum qui vocatur Fliddale et sic sequendo Fliddale usque ad diuisas Staney superioris et Staney Inferioris saluo dictis abbati et conuentui Cestrie et successoribus eorum et hominibus chymino competenti ab orientali parte uille de Witeby hominibus et equis honestis absque bigis et plaustris quem prius habere solebant Quorum iuratorum veredicto in presencia predicti iusticiarii et aliorum ibi existencium publicato idem iusticiarius iudicialiter pronunciauit quod partes ipsas diuisas per ipsos iuratores tunc factas firmas inperpetuum habeant et stabiles Et cum post hec ipsi de Stanlowe peterent communam pasture animalibus suis de Staney et eciam turbariam in brueris de Sotton et de Wyteby uersus predictos abbatem et conuentum Cestrie tandem contemplacione predicti comitis et aliorum amicorum communi interuentu inter partes ita conuenit quod ipsi Cestrie concesserunt pro se et successoribus suis quantum ad se pertinet quod ipsi de Stanlowe et eorum successores habeant communam pasture animalibus suis de Staney in dictis brueris scilicet a cornero noui fossati quod diuidit inter dicta maneria de Wyteby et de Staney ascendendo directe uersus ii dumos stantes in campo de Capenhurst uersus Molinton prout fouee et fossata et signa de consensu parcium in dictis brueris sunt facta usque ad diuisas inter Sotton et Capenhurst sine contradiccione dictorum abbatis et conuentus Cestrie uel eorum successorum Ita quod nec dicti abbas et conuentus de Stanlowe nec aliquis nomine eorum aliquid iuris uel clamii seu commune cuiuscunque ultra dictas foueas fossata uel signa uersus dictas villas de Witeby et Sutton clamabunt exigent seu vendicabunt imperpetuum Concesserunt eciam ipsi Cestrie quod ipsi de Stanlowe habeant annuatim xxix carratas turbarum in bruera de Witeby et non plures per has diuisas scilicet a cornero dicti fossati inter Wyteby et Staney pro diuisis facti linealiter usque ad veterem crucem super bruera de Sotton a foueis et signis inter dictos fossatum et crucem directe factis uersus Paruum Staney et Cherleton fodiendarum sine impedimento aliquorum saluis tamen ipsis Cestrie dominio suo et omnimodis approuiamentis suis in eisdem brueris de Wyteby et Sutton quandocunque sibi viderint expedire faciendis Ita tamen quod per nimia approuiamenta ipsorum predicti de Stanlowe non impediantur quin habeant racionabilem pasturam in dictis brueris animalibus suis de Staney sine superoneracione infra predictas diuisas et prefatas xxix carratas turbarum in loco predicto fodiendarum ac eciam saluis omnibus hominibus dictorum abbatis et conuentus Cestrie turbariis pasturis aysiamentis et omnibus aliis commoditatibus que in dictis brueris ubique ante confeccionem presentis scripti habere solebant sine contradiccione machinacione impedimento opere uel facto ipsorum de Stanlowe inperpetuum [in cuius rei testimonium presenti scripto in modum cyrographi de expresso consensu partium confecto alternatim sigilla sua fecerunt apponi et in rotulo qui vocatur Domesday procurauerunt irrotulari Hiis testibus predicto Guncelino tunc Justiciario Cestrie et xiii iuratis superius nominatis Ada de Chetewynd magistro Johanne de Stanlegh Johanne de Wetenhale Ada de Putington Hugone de Durham Willelmo Bernard Willelmo de Bunebury et aliis]