Charter Document - 00900070
| Charter Number: | 00900070 |
|---|---|
| Cartulary Title: | The Chartulary or Register of the Abbey of St. Werburgh, Chester |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1188 |
| Date type: | Internal, Calendar, Papal |
| Resource Link(s): |
|
Charter:
Clemens episcopus seruus seruorum Dei dilectis filiis abbati et fratribus sancte Werburge de Cestria salutem et apostolicam benediccionem Congruam officii nostri accionem prosequimur cum viros religiosos caritate debita confouemus eorumque votis et desideriis benigno fauore annuimus et ne indebitis agitentur molestiis ipsis apostolice defensionis subsidium impertimur Ea propter religionis et honestatis vestre feruorem fideique constanciam qua beato Petro et nobis firmitate immobili adheretis studiosius attendentes ecclesiam vestram cum omnibus que in presenciarum legitime possidet aut in futurum iustis modis Deo propicio poterit adipisci sub beati Petri et nostra proteccione suscipimus et presentis scripti patrocinio communimus statuentes ut nec episcopo vestro nec eius officialibus liceat vobis vel ecclesiis vestris indebitas acciones imponere siue iniustis grauaminibus vos ulterius fatigare In parochialibus autem ecclesiis quas tenetis liceat vobis clericos eligere et dyoecesano episcopo presentare quibus si idonei fuerint episcopus curam animarum committat ut illi de spiritualibus vobis autem de temporalibus debeant respondere Preterea vobis auctoritate apostolica indulgemus ut ecclesias que ad vos racionabiliter pertinent ecclesias videlicet de Estham de Neston de Estuna de Deneford ad sustentacionem fratrum et hospitum ac pauperum libere possitis communi assensu et racionabili prouidencia deputare ita quod nulli liceat easdem ecclesias ab usu et utilitate fratrum et hospitum ac pauperum temeritate qualibet remouere Decernimus ergo ut nulli omnino hominum liceat hanc paginam nostre proteccionis et concessionis infringere vel ei aliquatenus contraire Siquis autem hoc attemptare presumpserit indignacionem omnipotentis Dei et beatorum Petri et Pauli apostolorum eius se nouerit incursurum Datum Laterani ix Kalendas Aprilis pontificatus nostri anno primo
Source (click image below to view full size)
