Charter Document - 00899781
| Charter Number: | 00899781 |
|---|---|
| Cartulary Title: | The Cartulary of Oseney Abbey |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1152 |
| Date type: | Internal, Calendar |
| Resource Link(s): |
|
Charter:
Eugenius episcopus seruus seruorum dei dilecto filio Wigodo priori sancte Marie de Oseneia salutem et apostolicam benedictionem Sicut officii nostri consideracione astringimur ea que in controuersiam deducuntur rationabili fine decidere ita nimirum ordo rationis expostulat que rationabiliter fuerint decisa firmare et ne in dubium recidiuo litigio deducantur sedis apostolice munimine stabilire Ideoque dilecte in domino fili controuersiam que super ecclesiis sancti Georgii et sancte Marie Magdalene inter te et filium nostrum Robertum priorem sancte Frideswide agitabatur nostro iudicio terminatam in scripti seriem decreuimus redigendam et ne prolatam a nobis super ea sententiam in ambiguitatem posteritas secutura deducat eam auctoritate huius pagine statuimus muniendam iam dictus siquidem Prior ideo sibi ius in ecclesia sancti Georgii uendicabat quoniam Walterus archidiaconus quondam Oxenefordie et ecclesie prefate canonicus postquam ecclesia sancti Georgii per patronos ipsius et venerabilem fratrem Robertum Lincolniensem episcopum fuit ecclesie tue commissa in parte prebende sue sub ecclesie nomine edificium quoddam erexit quod idem Prior ecclesie sue per ipsum archidiaconum dicebat fuisse collatum super ecclesia uero sancte Marie Magdalene ideo controuersiam tibi mouebat quoniam bone memorie Robertum quondam Herefordensem episcopum qui causam que super eadem ecclesia inter ipsum Priorem et ecclesiam sancti Georgii olim noscitur agitata susceperat terminandam eam non ex integro diffinisse sed aliquid questionis in ea reseruasse dicebat His autem rationibus utriusque partis diligentius auditis et cognitis quoniam prescriptus archidiaconus sicut ex scriptis venerabilium fratrum nostrorum Thedbaldi Cantuariensis archiepiscopi et apostolice sedis legati et antefati Lincolniensis episcopi euidenter innotuit contra prohibitionem eorum ipsum edificium non tam religiose quam invide inuentus est construxisse et quoniam archidiaconi sine coniuencia suorum episcoporum ecclesiam alicui concedere de canonum censura non possunt predictum edificium et quicquid perinde iuris prenominatus Prior in ecclesia sancti Georgii requirebat ei abiudicauimus et te ab illius impetitione de cetero fore censuimus absolutum Super ecclesia uero sancte Marie Magdalene quoniam prescriptus Herefordensis episcopus sicut ex litteris eius manifeste apparuit nichil questionis inuentus est in causa quam ut predictum est decidendam susceperat reseruasse atque cum Prior litteras in dubium reuocaret tu eas ueras duobus idoneis testibus iuramentum prestantibus approbasti te ab illius impetitione absoluimus et sententiam sepe dicti episcopi auctoritate sedis apostolice confirmauimus Si quis autem [] Datum Signie viii Idus Februarii