Charter Document - 00897782

Alexander episcopus seruus seruorum dei dilectis fratribus [Gilebertus Lundoniensi et Rogerus Wigorniensi episcopis salutem et apostolicam benedictionem Cum ex querela abbatis et] canonicorum [de Oseneia accepimus quod] Prior sancte Frideswide eos ab ecclesia sancte Marie Magdalene [contra sententi]am beate recordationis patris et predecessoris nostri Eugenii pape per canonicos suos ui et armata manu eiecisset et clerici eorundem canonicorum uulnerati fuissent fraternitati uestre si bene meminimus per scripta nostra mandauimus quod si constaret predictos canonicos de Oseneia a prelibata ecclesia uiolenter fuisse eiectos eam ipsis restitui faceretis Demum uero de proprietate cognoscentes si constare posset controuersiam que inter predictos canonicos super eadem ecclesia uertebatur a prefato predecessore nostro fuisse decisam ita quod nichil questionis esset reseruatum canonicis sancte Frideswide tam de proprietate quam de possessione appellatione remota perpetuum silentium imponeretis et clericos et laicos quos constaret uiolenciam intulisse uel inferri fecisse denunciaretis excommunicatos Cumque probata uiolentia canonici de Oseneia restituti fuissent et uos de proprietate uelletis cognoscere predictus Prior licet appellatio inhibita fuerit ad nostram audientiam appellauit Kalendas Nouembris nuper preteritas diem sue appellationi prefigens Canonici autem multis expensis grauati et attendentes quod uos aliis occupati diem uelletis differre in uocem appellationis proruperunt et ipsis nuncium suum destinantibus Prior nec uenit nec aliquem pro se responsalem transmisit Nos ergo uolentes laboribus et dispendiis predictorum canonicorum pro nostri officii debito prouidere fraternitati uestre per apostolica scripta precipiendo mandamus et mandando precipimus quatinus si vobis constiterit per litteras prefati predecessoris nostri supra memoratam [appellacio]nem ita fuisse decisam quod nichil questionis fuisset reseruatum priori et canonicis sancte Frideswide super memorata ecclesia tam de proprietate quam de possessione omni occasione et appellatione remota perpetuum silentium imponatis non impedientibus [appellaci]onibus factis non obstantibus litteris ueritate [tacit] impetratis Preterea fructus a tempore illate uiolentie perceptos eisdem canonicis restitui faciatis et clericos et laicos quos tantam vim intu[lisse vobis constiterit] remoto appellacionis obstaculo excommunicatos denuncietis donec passis iniuriam congrue satisfaciant et cum litteris vestris [adierint limina] apostolica [Quod si uterque vestrum] his exequendis interesse non poterit alter ea nihilominus exequatur maiori in eorum executione diligentia et cura adhibita quam primum studueritis adhibere quia si secus egeritis graue nobis esset et molestum ac negligentiam et tepiditatem vestram cogeremur dure punire Datum Anag ii Idus Aprilis