Charter Document - 00890798
| Charter Number: | 00890798 |
|---|---|
| Cartulary Title: | The Cartulary of Oseney Abbey |
| Charter Language: | Latin |
| Charter Origin: | Religious |
| Charter Type(s): | promise |
| Date: | 1314 |
| Date type: | Internal, Calendar, A.D. |
| Resource Link(s): |
|
Charter:
Uniuersis sancte matris ecclesie filiis pateat per presentes quod cum ego Robertus de Carsintone perpetuus vicarius ecclesie beate Marie Magdalene extra portam borealem Oxonie a religiosis viris dominis meis abbate et conuentu Oseneye prefatam ecclesiam beate Marie Magdalene in propriis usibus canonice optinentibus super quibusdam minutis decimis oblacionibus et obuencionibus dicte ecclesie tractus essem in ius volens notam ingratitudinis euitare dictorum dominorum meorum uoluntati totaliter me submisi sub stipulacione legittima promittendo quod omnes minutas decimas oblaciones quascumque tam ad maius altare quam ad cetera altaria tam debitas quam ex deuocione fidelium quibuscumque diebus et festis ac obseruanciis ceremonialibus oblatas et obuenciones quascumque ad dictam ecclesiam prouenientes fideliter colligam seu colligi faciam et in pixide cum duabus serruris et clauibus quarum altera penes ipsos religiosos et altera penes me remanet fideliter reponam et absque omni diminucione integre conseruabo quousque per dictorum religiosorum procuratorem ad hoc deputatum porcio michi inde secundum modum a tempore cuius contrarii memoria non existit consuetum debita liberetur super quibus omnibus fideliter et sine dolo meo perpetuo obseruandis in pleno capitulo Oseneye sacramentum prestiti corporale Et quia postea michi quedam iniurie erant imposite quas dominus abbas ad instantem rogatum meum reliquit interim in suspenso volo et per presentes me obligo ad penam quadraginta solidorum pro commissis iniuriis persoluendam si super premissis vel eorum aliquo valeam legitime deprehendi In quorum omnium testimonium sigillum meum presentibus est appensum Datum apud Oseneyam iii Nonas Decembris anno domini MCCC quartodecimo