Charter Document - 00890787

Omnibus ad quos presens scriptum peruenerit tam presentibus quam futuris frater W dictus abbas de Thama et R prior de Abbendona et magister T de Watelei salutem in auctore salutis Nouerit uniuersitas uestra quod cum prior et canonici de sancta Frideswida mouissent controuersiam Abbati et canonicis de Oseneia super ecclesia beate Marie Magdalene sita extra portam aquilonarem de Oxeneford item super decimis de Northam item super decimis de croffta trium Bergarum quam Nigellus decanus tenuit coram nobis a domino papa Innocencio tercio iudicibus delegatis tandem partibus in presencia nostra constitutis mediantibus uiris zelum dei et religionis habentibus prefati prior et canonici de sancta Frideswida predictas querelas eisdem abbati et canonicis de Oseneia gratis et liberaliter in perpetuum remiserunt promittentes in uerbo ueritatis se nunquam eisdem super possessione uel proprietate predictarum rerum aliquam controuersiam esse moturos Omni uero iure quod prefati canonici de Oseneia in iamdictis ecclesia et decimis se habere asserebant in sua firmitate permanente prefati canonici de sancta Frideswida totum ius quod in sepedictis ecclesia et decimis se habere asserebant renunciacione coram nobis facta ipsis concesserunt et in perpetuum remiserunt Instrumenta etiam omnia que super predictis se habere ueraciter asserebant eis per manus nostras in iure resignauerunt usui aliorum instrumentorum si qua forte in posterum ex parte ipsorum reperta fuerint uel alias in eorum manus deuenerint penitus renunciantes Adiecerunt etiam prefati Prior et canonici in uerbo ueritatis quod nunquam ecclesiam ipsam sancte Marie Magdalene uel possessionem uel aduocacionem uel aliquid in eadem ecclesia uel decimis illis sine spontanea uoluntate eorum scilicet canonicorum de Oseneia a quocunque uel per quemcunque recipient nec aliquid in preiudicium et detrimentum prefate remissionis et concessionis per artem uel ingenium aliquo modo machinabuntur Huius autem remissionis et concessionis tempore ad plenam pacem et tranquillitatem ecclesiarum suarum partes ipse omnem querelam super predictis ecclesia et decimis et circa easdem res tam super fructibus quam super expensis et aliis que in huiusmodi causis exigi solent sibi ad inuicem gratis et liberaliter remiserunt Quia uero prefati Prior et canonici de sancta Frideswida unanimi assensu tocius conuentus sui predictam concessionem et remissionem carta sua et sigillorum suorum apposicione confirmauerunt nos easdem concessionem et remissionem ratas habentes eas auctoritate domini pape qua fungebamur duximus confirmandas et presentis scripti testimonio et sigillorum nostrorum apposicione corroborandas Insuper etiam prefatos abbatem et canonicos de Osenei ab impeticione dictorum Prioris et canonicorum sancte Frideswide et quantum ad petitorium et quantum ad possessorium iudicium et alios articulos causarum plenarie eadem auctoritate sentencialiter absoluimus Hiis testibus magistro Waltero de Gant abbate de Waltham Radulfo priore de Niweham magistro Nicholao de Westmost magistro Iohanne de Cernei magistro Thoma de Hela[m] magistro Nicholao de Hampt magistro Roberto de Clipstone magistro Ricardo de Tirintone magistro Simone de Cestria magistro Simone de Gloecestria magistro Stephano Scotto Waltero de Wisebech Adam de Clipstone Reg[inaldo] de Brachelei Iohanne Bretel Waltero de Lichesfeld Warino Rogero de Wicheford presbiteris Seerio clerico Iohanne clerico