Charter Document - 00641093
| Charter Number: | 00641093 |
|---|---|
| Cartulary Title: | Charters and Documents Illustrating the Cathedral, City and Diocese of Salisbury |
| Charter Language: | Latin |
| Charter Origin: | Religious |
| Charter Type(s): | Agreement |
| Date: | 1175 - 1210 |
| Date type: | Assigned |
| Resource Link(s): |
Reference Document for this Embedded Document |
Charter:
Omnibus Christi fidelibus ad quos presens scriptum pervenerit Andreas prior de Bradele et fratres et sorores leprose ejusdem loci salutem et orationes in Christo Noverit universitas vestra quod cum Henriens Bisset quondam advocatus nostre domus dedisset Margarete sorori sue quia celibem et contemplativam vitam ducit et ducere proposuit centum solidos redditus in certo loco in manerio de Burgate et eadem Margarete redditum illum diu integre possedisset miserta paupertatis domus nostre et doloris et miserie quas sustinent memorate leprose dedit et concessit nobis totum predictum redditum perpetuo possidendum eligens pro salute anime sue et antecessorum suorum se pauperem facere ut nos faceret ditiores reddens et resignans in manus nostras terram cum cartis quas memoratus Henricus frater suus ei fecerat de predicto tenemento Nos autem consilio magnorum et prudentium virorum communi deliberatione dedimus ei singulis annis quoad vixerit xxvi quarteria de meliori et mundiori frumento quod provenit domui nostre ubicumque voluerit illud habere ad recipiendum in domo sua apud Bradele quotiescunque sibi necesse fuerit Contulimus etiam ei simili modo xl et ix solidos probate monete singulis annis in quatuor terminis percipiendos scilicet in Natali xii solidos et iii denarios in Pascha xii solidos et iii denarios in festo S[ancti] Johannis Baptiste xii solidos et iii denarios et in festo S[ancti] Michaelis xii solidos et iii denarios Volumus etiam quod habeat a nobis singulis annis duas libras piperis in festo S[ancti] Michaelis Volumus etiam quod predicta Margarete habeat medietatem omnium proventuum preter redditum assisum de predicto tenemento de Burgate quoad vixerit Volumus etiam et statuimus quod predicta Margarete habeat et teneat et pacifice et cum omni honore possideat tota vita sua domos in curia nostra quas sibi fecit sumptibus suis fabricari statuentes nihilominus ut post decessum ipsius prefate domus cedant in usus leprosarum sine aliqua contradictione et vexatione Repromittimus etiam coram Deo quod nos ei debitum honorem et reverentiam in omnibus exhibebimus et quod non sustinebimus pro posse nostro quod aliquis ei molestiam inferat vel gravamen Constituimus etiam predicti beneficii et ordinationis fide jussores liberos homines tenementi de Bradele scilicet Hugonem de Angens et Willelmum filium ejus Randulfum de Angens Adam Penestrant et Galfridum filium ejus Willelmum filium Alani Johannem Luddin Galfridum de Aldeford Robertum Franceis Anketillum de Bitel Concedimus etiam et obligamus nos et bona nostra ut si forte quod absit ab hac donatione et concessione recesserimus capitulum Sarum compellat nos per ecclesiasticam censuram absque appellationis remedio ad observandum quod in predicta carta sive presenti continetur