Charter Document - 00640296

Universis sancte matris ecclesie filiis Robertus permissione divina episcopus Sarum salutem in Domino Altissimi nominis ad honorem optantes quod in ecclesia beate Marie de Boytone nostre dioeceseos ex nostra sollicitudine cultus divinus perpetuis temporibus augeatur de ea nunc per resignationem magistri Philippi de Stantone proximo ministrantis in ea vacante venerabili patre domino Godefrido Gyffard episcopo Wygornensi domino manerii de Boytone et ecclesie illius patrono hoc cum devota instantia postulante et ecclesiam ipsam ordinationi et dispositioni nostre totaliter submittente ordinamus et statuimus quod rector illius qui pro tempore fuerit per nos et successores nostros ad presentationem dicti domini episcopi et heredum vel successorum suorum predicti manerii de Boytone instituendus vite sit laudabilis et in presbyteratus ordine constitutus cure ejusdem personaliter intendat quodque tres alios dicti ordinis viros idoneos de assensu patroni ecclesie ipsius eligat et nobis presentet quos cum admiserimus juxta facultates suas in victualibus exhibeat congruenter eorum cuilibet annuatim duas marcas pro emendis vestibus et aliis necessariis in festis Annunciationis Dominice et Sancti Michaelis pro equalibus portionibus impensurus In quibus eligendis et presentandis si rector et patronus predicti discordes per unum mensem vel negligentes extiterint alii idonei presbyteri loco deficient[ium] ex tunc per nos et successores nostros canonice preficiantur ibidem eandem exhibitionem cum stipendiis percepturi Quod si rector taliter institutus in fata decesserit postquam fructus percepit autumnales nihilominus eo anno dictis presbyteris sustentatio congrua cum stipendiis supradictis de fructibus illius integraliter ministretur et de medietate ejus quod residuum decedens ipse testari possit et illius voluntas si inde testatus fuerit debitum sortiatur effectum alioquin de medietate ipsa fiat quod in casu consimili hactenus est obtentum Altera vero medietas successori suo reservetur Et si quacunque parte anni alibi se transferendo gratis cesserit nihil omnino post cessionem hujusmodi percipiat sed totum cedit in usum futuri rectoris pro oneribus predictis supportandis Omnes siquidem ad sancte conversationis testimonium sub uno tecto commorantes honeste capis nigris et superpelliciis induti ecclesiam intrent ut Domino laudes simul persolvant secundum usum nostre ecclesie cathedralis cum vigiliis et aliis obsequiis mortuorum horas canonicas decantando integraliter et distincte Ad dispositionem siquidem rectoris predicti ab ipsis quatuor misse quotidie celebrentur una de die alia de beata Virgine cum nota et due pro episcoporum Sarum Hugonis Gyffard Sibille quondam uxoris ejus cujus corpus in dicta ecclesia quiescit humatum sue prolis parentumque suorum et omnium in Christo quiescentium animabus nisi infirmitas alicujus eorum vel alia inevitabilis aut rationabilis causa prestiterit impedimentum Ad hec provideat idem rector unum diaconum et alium subdiaconum qui in ecclesia sibi et dictis presbyteris in horis canonicis peragendis et missis celebrandis assistant continue et ministrent Precipimus etiam quod qui ad rectorium hujusmodi fuerit admittendus antequam nanciscatur possessionem ipsius ecclesie prestet corporaliter juramentum quod hanc nostram ordinationem fideliter observabit et perfectius exequetur Dictoque rectori presbyteri memorati faciant simile sacramentum Porro prescriptis rectori et presbyteris prehabito super hoc tractatu cum capitulo nostro et eorum expresso accedente consensu ecclesiam supradictam cum suis pertinentiis perpetuo concedimus juxta ea que jam diximus obtinendam et auctoritate pontificali plenissime confirmamus Si quis igitur premissis in aliquo contravenire presumpserit indignationem Dei omnipotentis incurrat et Virginis gloriose In quorum testimonium nostri ac nostri capituli ac venerabilis patris domini Guillelmus Gyffard episcopi Wygorniensis prelibati sigilla presentibus literis sunt appensa Datum apud Remmesbure xvii kalendas Januarii anno gratie MCCLXX nono