Charter Document - 00640287

In nomine Patris et Filii et Spiritus Sancti Amen Ego Robertus thesaurarius Sarum sacerdos indignus commendo Deo Patri et Filio et Spiritui Sancto animam meam qui sua potentia ipsam fecit ut voluit per Filii sui sapientiam redemit ne perderet per Spiritus Sancti bonitatem procedentem ab utroque resuscitabit et glorificabit et dotabit in hac fide spe et caritate in manus tuas Domine commendo spiritum meum Corpus meum do lego et commendo ad sepeliendum ante altare reliquiarum in ecclesia cathedrali Sarum Si confratres et concanonici suum adhibuerint assensum volo et precipio quod tumulus non levetur ultra pavimentum sed lapis suppositus sequetur pavimento quod si fratres non consenserint dispositioni ipsorum qui suum consensum non adhibuerint locum mee sepulture humiliter committo Nihilominus ad habenda perpetuum capellanum omnibus diebus pro anima mea et pro animabus episcoporum canonicorum vicariorum ecclesie Sarum et pro animabus fidelibus defunctis deservientem in dicto altari ingredientem et egredientem chorum instituendum et corrigendum per dominos decanum et capitulum et ad stipendiarium eum per quatuor terminos anni consuetos in ecclesia Sarum insuper ad emendum redditum ad sustinendam cereum perpetuo ardentem coram imagine Crucifixi cujus cerei administratio ad dictum capellanum pertinebit do lego ducentas marcas ut si quid desit de una emptione impleatur de alia vel ut commodius simul possint comparari Hanc autem pecuniam de domibus meis in clauso Sarum celeriter post obitum meum plus offerenti vendendis ad ministrandum ad dictum cereum manu tenendum et capellanum stipendiarium do lego et assigno et si quid de dicta venditione superfuerit illud cedat pro pane et vino et lumine ad dictum altare Capellanus autem ibidem administraturus agnoscat non solum missarum solemnia sed cotidie adimpleat exequias mortui tam feriatis quam non feriatis nisi illis diebus intersit in choro quibus celebrantur vigilie mortuorum Item do lego septem libras ad emendum quatuordecim phialas argenteas ut quodlibet altare duas habeat in ministerium in perpetuam mei memoriam et in qualibet phiala fiat sculptura trium clavium Hanc autem pecuniam volo et mando recipi de magna mea scutella argentea interferculari et de tribus ciphis meis argenteis planis Cuilibet autem vicario ecclesie Sarum die sepulture mee do lego dimidiam marcam sacriste xii denarios altariste xii denarios choriste vi denarios et in die triennali nullus pauperum deficiat erogatione Ad emendum redditus decem librarum die obitus mei distribuendarum per manum communiri secundum considerationem et ordinationem decani et capituli do lego ducentas marcas ita quod quelibet persona viginti denarios recipiat canonicus duodecim vicarius sex sacrista tres altarista duos chorista unum qui meis exequiis personaliter interfuerint vel cum rationabili causa absentes fuerint quicquid autem superfuerit eodem die in pastu pauperum deputetur Si ab initio adolescentie mee quemquam lesi in corpore gravavi in facultate offendi in fama per executores meos mediante facultate mea queso remissionis gratiam mihi impertiri Et si alicujus debitor inveniar sine more dispendio quod purum et clarum est solvatur quod dubium et obscurum apparuerit per executorum conscientiam satisfiat ut misericordia potius observetur in actu quam rigor justitie Fabrice ecclesie Sarum in compensationem debiti in quo eidem tenebar do lego quinquaginta marcas una cum meliori palefrido meo Fabrice ecclesie beati Edmundi in civitate Sarum propter missas decem marcas precipio solvi et alias decem ad eandem fabricam do lego Ad fabricam ecclesie beati Martini assigno viginti solidos Ad reparationem cancelli de Kalne do lego quinquaginta solidos ad reparationem ejusdem ecclesie do lego quinquaginta solidos Ad reparationem capelle de Chyriel viginti solidos Ad reparationem capelle de Berewyk viginti solidos Ad reparationem cancelli de Stantone quinque marcas ad reparationem mansionis et curie persone de Stantone centum solidos ad reparationem domicilii ejusdem in villa de Wyltone quadraginta solidos Fabrice ecclesie conventualis de Wyltone centum solidos Ad cooperiendum portale de Eneford totum plumbum meum de Eneford scilicet decem pedes Ad reparationem cancelli de Alwarebyri viginti solidos Ad reparationem cancelli de Puttone viginti solidos Ad reparationem cancelli de Farle viginti solidos Ad reparationem ecclesie de Sutton quam aliquando tenebam viginti solidos Ad reparationem ecclesie de Brochetone unam marcam Pauperibus et miserabilibus parochie de Kalne cum capella triginta marcas Pauperibus parochie de Eneford cum capella decem marcas Pauperibus parochie de Stantone centum solidos Pauperibus parochie de Fyheldene decem marcas Pauperibus parochie de Alwarebyri quinque marcas Pauperibus parochie de Puttone quadraginta solidos Pauperibus parochie de Farle viginti solidos Ad reparationem cancelli de Wynterburne xx solidos Cuilibet scholari Vallis Scolarium dimidiam marcam ad emendum habitum Ad altare reliquiarum do lego vestimentum meum calicem et bacinos meos minores de capella ut sint ibi in perpetuam memoriam insuper et cistam meam ad servandum ornamenta ejusdem capelle Ad depingendum fabricam circa crucem elevatam do lego decem marcas Fratribus Minoribus Sarum do lego centum solidos Fratribus Predicatoribus Wylton centum solidos Ad perficiendum frontem capelle Sancti Edmundi de Estmara decem marcas Monasterio de Stanlehe quadraginta solidos Monasterio de Bradenestok quadraginta solidos Monasterio de Lakoc quadraginta solidos Hospitali Sancti Nicholai Sarum quadraginta solidos cum lecto meo integro Monasterio Ederoso quadraginta solidos Ad supplendum defectus ecclesie de Fofunte xx solidos pauperibus ejusdem ecclesie xx solidos Ad supplendum defectus ecclesie de Berewyke Sancti Johannis xx solidos pauperibus parochie ejusdem xx solidos Hospitali Sancti Johannis Wylton xx solidos Hospitali Veteris Sarum xx solidos Hospitali de Kalne xl solidos Et quoniam in voto semper habui ut per communitatem vicariorum Sarum approbante capitulo mihi provideretur in celebratione unius misse singulis diebus in perpetuum pro anima mea in remissionem peccatorum meorum ad emendum redditus et participandum inter eos pro rata singulorum do lego centum marcas ita tamen quod dicte centum marce non sint distribute inter ipsos sed redditus empti Monasterio de Ambesbyre quinque marcas Thome ballivo meo de Kalna do lego decem marcas et Baardum equum meum quem constituo ad prosequendum negotia testamenti mei una cum Philippo clerico meo per consilium executorum meorum Eidem Philippo do lego quinque marcas et equum quem emi de aurifabro Henrico clerico meo centum solidos et equum qui dicitur Malk Nicholao de Sancto Quintino unum jocale centum solidorum vel centum solidos Ad faciendum septem annualia in ecclesia de Calne de Stantone de Eneford Fycheldene Alwarebyre Putton Berewyk viginti libras Magistro G coco quatuor marcas Omnia utensilia coquine mee do lego ad Vallem Scolarium Stephano de Alwarebyre do lego quinque marcas et Morellum pallefridum meum Dawe quondam panetario meo xl solidos feratori meo xl solidos Koc xl solidos Waltero pallefridario meo xx solidos perlec[tori] xx solidos pistori x solidos Ade Kino unam marcam Henrico de Putton xl solidos Wade xl solidos Martino de Eneford xl solidos Hunfrido de Fycheldene x solidos Normanno unam marcam sub thesaurario cuppam meam de mazero et ciphum argenteum pretii xx solidorum Willelmo vicario meo do lego habitum meum et ciphum unam de murra et unam marcam argenti Willelmo de Poterne ciphum de murra et unam marcam argenti Cochlearia mea do lego ad Vallem Scolarium Hugoni sacrista sex marcas in recompensatione debiti in quo eidem teneor Hankino xx solidos Waltero de Sutton dicto clerico quinque marcas Minor portehors quod fuit Anketilli de Wyntonia rectoris ecclesie Sancti Clementis remaneat penes dominum J vicarium de Hursele pro anima ipsius Anketilli Missale meum perpetuo remaneat ad altare reliquiarum Item magistro Ricardo cementario unam marcam Ricardo carpentario unam marcam Margerie le Sansere unam marcam Item volo et ex parte Dei precipio quod de bonis meis tanta summa redditus per prudentiam et considerationem executorum meorum ematur quod quilibet vicarius cathedralis ecclesie Sarum de dicto redditu obolum diurnum singulis diebus percipiat in perpetuum ita videlicet quod eo sepius et libentius servitio divino dicte ecclesie cum devotione intersint et quod in orationibus suis mei perpetuam habeant memoriam et quod centum pauperes quotidie habeant xxv denarios ita quod quilibet per se singulis diebus recipiat unum quadrantem pro anima mea et animabus quibus ego quoquomodo sum obligatus et animabus omnium fidelium defunctorum in perpetuum in civitate Novarum Sarum Quicquid autem de bonis meis undecumque provenientibus superinventum fuerit solutis debitis et legatis volo precipio et mando quod in tres partes equales dividatur una pars pauperibus et miserabilibus viduis languidis et invalidis plene et integre erogetur tam in pastu eorum quam vestitu et sotularibus habita ratione in singulis parochiis secundum quod plus aut minus dispensavi alia pars pro animabus ipsorum vivis similiter quibus debitor fui bona recipiendo sive injuriam faciendo vel quocunque alio modo tenebar plene et integre per considerationem executorum meorum pauperibus erogetur tertia pars circa reparationem ecclesiarum mearum expendatur Hujus testamenti mei executores constituo nominatos et rogatos dominum R[obertum de Wykehampton] decanum et R[adulfum Hecham] cancellarium N[icholaum de Capella] archidiaconum J[ohannem de Burton] subdecanum Sarum constituo ut in dicta executione consilium et auxilium et auctoritatem impendant secundum Deum sicut vellent procedere et adimplere sua testamenta Preterea ad recipiendum erogandum ministrandum solvendum et omnia negotia testamenti mei de consilio superiorum proficienda ubi ceteri prenominati non possint commode interesse aut noluerint constituo et ordino una cum ipsis dominum Johanne de Holteby canonicum Sarum Nicholaum de Sancto Quintino et dominum Johannem sub thesaurarium ita videlicet quod de die in diem procedatur in dicto testamento quousque plene perficiatur