Charter Document - 00640158

Henricus Dei gratia rex Anglie dominus Hybernie dux Normannum Aquitanie et comes Andegavie archiepiscopis episcopis abbatibus prioribus comitibus baronibus justitiariis vicecomitibus prepositis ministris et omnibus ballivis et fidelibus suis salutem Sciatis nos intuitu Dei et pro salute anime nostre et antecessorum et heredum nostrorum concessisse Deo et ecclesie Sancte Marie Nove Sarum et venerabili patri Ricardo ejusdem ecclesie episcopo et successoribus suis omnia amerciamenta de omnibus hominibus terris et feodis ejusdem episcopi et de decano et omnibus canonicis ecclesie Sarum et de omnibus hominibus et terris et feodis eorundem que amerciamenta ad nos vel ad heredes nostros vel ad vicecomites vel constabularios vel ad alios ballivos nostros pertinere possent si predicta amerciamenta episcopo et successoribus suis non concessissemus Et volumus quod idem episcopus et successores sui habeant plenam potestatem ad distringendum omnes predictos ad predicta amerciamenta sibi reddenda Et prohibemus super foris facturam nostram ne quis de predictis amerciamentis colligendis vel recipiendis sive districtione ob hoc facienda nisi per voluntatem episcopi aut successorum suorum se intromittat Concessimus etiam eidem episcopo et successoribus suis quod si aliquis hominum de terris vel feodis suis vel predictorum decani et canonicorum vel hominum suorum pro delicto suo vitam vel membrum debeat amittere vel fugere et judicio stare noluerit vel aliquodcunque delictum fecerit pro quo debeat catalla perdere ubicumque de eo justitia fieri debeat sive in curia nostra sive in alia curia omnia catalla sicut illius episcopi et successorum suorum Et liceat eidem episcopo et successoribus suis sine omni disturbatione vicecomitum et quorumcunque ballivorum nostrorum et aliorum ponere se in seysinam de predictis catallis in predictis casibus et aliis quando ballivi nostri si catalla illa ad nos pertinerent ea in manu nostra seysire possent et deberent Concessimus preterea prefato episcopo et successoribus suis quod nullus vicecomes vel constabularius vel alius ballivus noster habeat posse vel ingressum in predictis terris feodis et hominibus predicti episcopi et successorum ejus et dictorum decani et canonicorum et successorum eorum sed totum pertineat ad supradictum episcopum et successores suos et eorum ballivos preter attachiamenta de placitis corone Et volumus quod supradictus episcopus et successores sui sint in perpetuum quieti de omnibus escapiis latronum et omnium aliorum prisonum Concessimus etiam memorato episcopo et successoribus suis quod habeant singulis septimanis in perpetuum unum mercatum in manerio suo de Sunninge apud Wokingham per diem Martis et unum mercatum qualibet septimana in perpetuum in manerio suo de Remmesbire per diem Martis cum omnibus libertatibus et liberis consuetudinibus ad hujusmodi mercata pertinentibus nisi sint ad nocumentum vicinorum mercatorum Concessimus insuper prenominato episcopo et successoribus suis quod episcopi et decani et canonici Sarum et successores sui et omnes homines eorum et de omnibus feodis suis sint quieti in perpetuum de theloneo per totam terram nostram et de sectis scyrarum et hundredorum et de operationibus castellorum et de omnibus aliis operationibus Preterea concessimus sepe dicto episcopo et successoribus suis quod licet processu temporis aliqua libertatum eis a nobis concessarum quocunque casu contingente usi non fuerint ea nihilominus libertate predicta utantur absque omni contradictione non obstante eo quod aliquo casu contingente ea usi non fuerint Omnes autem libertates predictas et liberas consuetudines et quietancias concessimus pro nobis et heredibus nostris et presenti carta confirmavimus Deo et ecclesie Sancte Marie Nove Sarum et supradicto episcopo et successoribus suis in liberam puram et perpetuam elemosinam Quare volumus et firmiter precipimus quod ipsi ita eas habeant et teneant in perpetuum et predictus decanus et canonici Sarum et successores eorum et omnes homines et terre et feoda eorum et omnes homines de feodis illis et terre et alia feoda ipsius episcopi et omnes homines de feodis illis habeant predictas libertates et liberas consuetudines et quietancias bene et in pace integre et plenaria in omnibus rebus et locis sicut predictum est His testibus Jocelino Bathoniensi episcopo Luca capellano decano Sancti Martini London Huberto de Burgo comite Cantie justiciario nostro Willelmo de Albrincis Waltero de Evermue [W de Stutevyl Petro filio Herberti Alano Basset Radulfo filio Nicholai seneschallo nostro] Waltero de Prestone Roberto de Ambervill Dat[um] per manum venerabilis patris Radulfi Cycestr episcopi cancellarii nostri xxiii die Martii anno regni nostri undecimo