Charter Document - 00640126
| Charter Number: | 00640126 |
|---|---|
| Cartulary Title: | Charters and Documents Illustrating the Cathedral, City and Diocese of Salisbury |
| Charter Language: | Latin |
| Charter Origin: | Religious |
| Charter Type(s): | Agreement |
| Date: | 1220 - 1228 |
| Date type: | Assigned |
| Resource Link(s): |
|
Charter:
Omnibus Christi fidelibus ad quos presens scriptum pervenerit Hugo Lincolniensis et Jocelinus Bathoniensis Dei gratia episcopi salutem in Domino Noveritis quod cum controversia mota esset inter nobilem virum Alanum Basset et priorem et canonicos de Berencestre super ecclesia de Cumptone tam dictus Alanus quam prior et canonici insuper et venerabilis frater dominus Ricardus Sarum episcopus et W[illelmus] decanus et capitulum Sarum in nos concesserunt et ordinationi nostre pure et absolute subjecerunt ratum et gratum habituri quicquid de dicta ecclesia et ejus proventibus ordinaremus Nos itaque deliberatione et requisito prudentum virorum consilio de predicta ecclesia de Cumptone et ejus proventibus ordinamus in hunc modum videlicet quod predictus episcopus Sarum et ejus successores habebunt in perpetuum advocationem predicte ecclesie de Cumptone cum omni jure ad advocationem ejusdem ecclesie pertinente ita quidem quod prefatus episcopus Sarum et successores sui conferent in perpetuum cui voluerint idonee persone tertiam partem decimarum garbarum totius parochie de Cumptone et omnes minutas decimas de jure que debentur eidem ecclesie et omnes obventiones altaris et cimiterii predicte ecclesie et totam terram et curiam que persone illius ecclesie est cum omnibus libertatibus et liberis consuetudinibus ad predictam ecclesiam et terram illius pertinentibus preter duas partes decimarum predicte parochie et croftam que jacet juxta curiam persone et unam acram prati vicinam crofte eidem Quas duas partes decimarum garbarum et croftam et acram prati integre habebunt in perpetuum dicti prior et canonici nomine perpetui beneficii absque omni onere ordinario extraordinariis omnibus inter personam qui pro tempore fuerit et priorem et canonicos predictos pro rata percipiendis De consensu etiam dicti prioris et canonicorum providimus quod de terra que fuit persone persona qui pro tempore fuerit decimas non dabit Si quid vero in hac ordinatione nostra obscurum fuerit vel minus plene declaratum illud de consensu partium nobis reservavimus declarandum Hanc autem ordinationem nostram partibus recitavimus et ipsa ab eis gratanter fuit acceptata In cujus rei testimonium et robur tam sigillis nostris quam sigillis memorati episcopi Sarum et capituli et predictorum Alani et prioris et canonicorum fecimus presens scriptum communiri Valete