Charter Document - 00640079
| Charter Number: | 00640079 |
|---|---|
| Cartulary Title: | Charters and Documents Illustrating the Cathedral, City and Diocese of Salisbury |
| Charter Language: | Latin |
| Charter Origin: | Lay |
| Charter Type(s): | Grant |
| Date: | 1201 |
| Date type: | Assigned |
| Resource Link(s): |
|
Charter:
Sciant presentes et futuri quod ego Alanus de Bayocis intuitu caritatis et pro animabus patris mei Randulfi de Bayocis et matris mee Margarete et omnium antecessorum meorum et pro salute anime mee precipue et pro salute Johanne uxoris mee et Johannis heredis mei et omnium successorum meorum dedi et concessi et hac presenti carta mea confirmavi Deo et ecclesie beate Marie Sarum in puram et perpetuam elemosinam et quietam ab omni seculari servitio ecclesiam meam de Waya cum omnibus pertinentiis suis et libertatibus et liberis consuetudinibus suis et cum omnibus decimis tam majoribus quam minoribus tam de toto dominico meo in eadem villa quam de villenagiis ad constituendam in ecclesia Sarum prebendam Ita ut venerabilis pater Herbertus Dei gratia Sarum episcopus et successores sui de eadem ecclesia de Waya sicut de ceteris prebendis ecclesie Sarum pro voluntate sua disponant et ordinent Ego autem cum hac donatione corpus meum cum de hoc seculo exiero dedi Deo et beate Marie in cimiterio Sarum ecclesie sepeliendum ut per divinam gratiam omnium orationum et suffragiorum et aliorum beneficiorum que in eadem ecclesia Sarum et in omnibus ei subjectis fient in perpetuum ego et antecessores et successores mei participes effici mereamur Et ut hec donatio firma et stabilis perpetuo perduret eam presenti scripto et sigilli mei munimine roboravi His testibus Philippo de Hauekescherich Rogero de Winhisham Thoma de Chelbeham magistro Petro canonico de Suthewic Bartholomeo capellano domini episcopi Sarum Marcello de Wilton Willelmo de Wint Waltero de Berewik Gileberto Sarum Waltero de la Dune Symone de Pilesdune Hugone de Hupeland Johanna uxore mea et multis aliis