Charter Document - 00640038
| Charter Number: | 00640038 |
|---|---|
| Cartulary Title: | Charters and Documents Illustrating the Cathedral, City and Diocese of Salisbury |
| Charter Language: | Latin |
| Charter Origin: | Religious |
| Charter Type(s): | Confirmation |
| Date: | 1160 |
| Date type: | Assigned |
| Resource Link(s): |
|
Charter:
Ricardus Dei gratia London episcopus dilectis sibi in Domino universis sancte matris ecclesie filiis ad quos presentes litere pervenerint salutem que nunc est et quam speramus in Domino Que ad ecclesiarum utilitatem et carum perpetuam tranquillitatem stabilita sunt his assensu[m] prebere et ut in perpetuum valitura permaneant hec scriptis et munimentis aliis roborare caritate id procul dubio suggerente debemus Ea propter universitati vestre presenti scripto notificamus causam que vertebatur inter Reginaldum clericum de Campo Florido et abbatem de Monteburgo et Willelmum clericum jam dicti abbatis super ecclesia de Porestok nobis a domino Papa delegatam hoc tandem modo conquievisse Partibus siquidem statuto sibi die in nostra presentia constitutis jam dictus Reginaldus se memoratam ecclesiam de Porestoke presentatione Roberti de Arundel ejusdem quondam ecclesie advocati per manum bone memorie Rogeri Sarum quondam episcopi canonice adeptum ipsam diutius possedisse et ea se postmodum violenter ejectum fuisse constanter asseverabat postulans ut eorum que dicebat probationem admitteremus et ipsi prefate ecclesie possessionem juxta mandatum domini Pape restitui faceremus Jam dicti vero abbatis procuratores quos ad hoc ad nos direxerat et prefatus Willelmus clericus qui presens aderat peremptoriam sibi incontinenti exceptionem opponentes injuste sibi [de] prenominata ecclesia de Porestoke a jam dicto Reginaldo moveri controversiam asserebant proponentes quod cum Elmero ejusdem ecclesie quondam persona super hac eadem ecclesia in presentia Adelmi Dorsetie archidiaconi ex mandate domini Sarum episcopi jampridem mota fuisset controversia Idem Reginaldus juri siquid unquam in eadem ecclesia habuerat in ipsius archidiaconi et totius capituli presentia sponte renunciavit et se nunquam super ecclesia hac moturum controversiam fidei interpositione firmavit Nobis itaque super his que ab eis dicebantur tam scripto ipsius archidiaconi quam viva voce testium omni exceptione majorum fide sufficienter facta memoratum abbatem de Monteburgo et sepe dictum Willelmum a jam dicti Reginaldi petitione auctoritate domini Pape qua in hoc sancimus negotio absolvimus et eidem Reginaldo super ejusdem ecclesie repetitione silentium perpetuum imposuimus Reginaldus vero ea que super refutatione a se facta dicebantur ad memoriam revocans procedens in medium liti huic in perpetuum sponte renunciavit et se nunquam de cetero monachis de Monteburgo vel Willelmo clerico vel successoribus ejus super ecclesia de Porestok moturum controversiam tactis sacrosanctis evangeliis firmissime repromisit Ne igitur quod actum est in dubium aut in irritum revocari possit in posterum id ipsum presentis scripti testimonio et sigilli nostri appositione communire et ea que in hoc functi sumus negotio auctoritate confirmare curavimus Valete