Charter Document - 00620053
| Charter Number: | 00620053 |
|---|---|
| Cartulary Title: | The Chartulary of the Augustinian Priory of St. John the Evangelist of the Park of Healaugh |
| Charter Language: | Latin |
| Charter Origin: | Lay |
| Charter Type(s): | Grant |
| Date: | 1240 - 1272 |
| Date type: | Assigned |
| Resource Link(s): |
|
Charter:
Omnibus Christi fidelibus ad quos presens scriptum pervenerit Petrus de Brus salutem eternam in domino Noveritis me divine pietatis intuitu et pro salute anime mee et animarum patris mei et matris mee dedisse concessisse et hac presenti carta mea confirmasse Deo et beate Marie et sancto Johanni Evangeliste de Parco de Helagh et canonicis ibidem Deo servientibus in liberam puram et perpetuam elemosinam totum servicium quod ad me vel ad heredes meos pertinet vel pertinere potest de una carucata terre in Jarum cum pertinenciis suis et cum homagio et toto servicio Petri de Monceaus et heredum suorum que michi facere consuevit idem Petrus pro predicta carucata terre quam videlicet carucatam terre Robertus de Munceaus dedit in maritagio cum filia sua Thome de Lutton Preterea concessi et confirmavi eisdem canonicis hospitale de Jarum cum omnibus pertinenciis suis et omnes terras et tenementa que ipsi habent in feodo meo tam infra Cliveland quam alibi cum omnibus pertinenciis suis in puram et perpetuam elemosinam Scilicet sex bovatas terre in villa de Pyketon quas habent de dono Willelmi de Tampton et unum toftum et unum croftum in Marton et tres bovatas in Toulesby de dono Roberti de Acclum et decem acras cum uno tofto in villa de Scalingis et duas bovatas in Kernardeby de dono Walteri de Hoton et unam bovatam in Waleton de dono Rogeri de Brus et sex decem bovatas in Bilton de dono Bartholomei Thuret et sex bovatas in Touleston quas habent de Willelmo de Kaerton et octodecim acras terre et unum toftum cum pertinenciis in Wyrkechale de dono Juliane Franckelayn tenenda et habenda omnia predicta in liberam puram et perpetuam elemosinam sibi et successoribus suis quiete ab omni servicio et exaccione secta curie et demanda adeo libere quiete et pure sicut purius liberius et quiecius dari potest elemosina aut confirmari Et ego predictus Petrus de Brus et heredes mei predictam donacionem meam et confirmacionem dictis canonicis factam contra omnes homines warantizabimus adquietabimus et defendemus imperpetuum Si quis vero eisdem canonicis aliquam terram vel redditum vel pasturam divine pietatis intuitu infra feodum meum donare voluerit concedo eisdem canonicis illud recipere et pacifice possidere absque impedimento mei et heredum meorum vel alicujus alterius ex parte nostra Et ut omnia predicta rata permaneant presens scriptum sigilli mei impressione roboravi Hiis testibus domino Nicholao de Stuteuill domino Rogero de Brus Thoma clerico et aliis