Charter Document - 00560079

In nomine Patris et Filii et Spiritus Sancti Amen Sciant tam presentes quam futuri quod cum orta esset contentio inter dominum H[ugonem] abbatem Cluniacensem et H[amelinum] comitem Warennie super nominatione et institutione prioris Lewensis tandem mediantibus domino H[uberto] Cantuariensi archiepiscopo et domino E[ustachio] Elyensi episcopo et domino G[alfrido] filio Petri tunc iusticiario Anglie de assensu utriusque partis presente domina Y[sabella] comitissa Warennie in cuius hereditate fundata est domus Lewensis et tam illa quam W[illelmo] filio et herede suo consentiente sopita est eadem contentio postquam diu durauerat in hunc modum uacante prioratu Lewensi cum nunciis comitis Warennie duo monachi Lewenses mittentur Cluniacum infra quindecim dies postquam contigerit prefatum prioratum uacare abbas autem Cluniacensis cum consilio sui conuentus bona fide et secundum conscientiam suam nominabit duos de ordine Cluniacensi quos magis idoneos crediderit ad administracionem domus Lewensis tam in spiritualibus quam in temporalibus exceptis duobus scilicet maiore priore Cluniaci et priore Karitatis in optione autem nunciorum comitis erit de duobus nominatis ab abbate ibi assumere quem maluerint qui eis sine dilatione tradetur in priorem Lewensem deducendus ad comitem et ecclesiam Lewensem et ab illis suscipiendus honorifice et sine difficultate Prior autem sic institutus per manum abbatis et ut dictum est a nunciis comitis assumptus liberam habebit adminstrationem in spiritualibus et temporalibus interius et exterius tam in instituendis quam in amouendis subpriore domus illius et prioribus cellarum et aliis obedienciariis et ministris ad eandem domum pertinentibus ita quod non poterit amoueri nisi meruerit ex manifesta et rationabili causa secundum regulam beati Benedicti Preterea abbas Cluniacensis non exiget de predicta domo nisi centum solidos nomine census annui nec aliquam ibi faciet exactionem salua autem erit ipsi abbati Cluniacensi plene dignitas sua et auctoritas in disciplinis correctionibus et aliis spiritualibus ad ordinem Cluniacensem pertinentibus Hec autem omnia utraque pars bona fide et sine malo ingenio firmiter obseruabit in perpetuum Acta sunt hec apud Lamehe[dam] anno Incarnationis Dominice mcci quarto idus iunii coram predictis mediatoribus et per illos presentibus et testibus dominis W[illelmo] Londoniensi et G[ilberto] Roffensi et H[erberto] Saresberiensi et M[algero] Wigorniensi et I[ohanne] Norwicensi episcopis et M[artino] de Certesia et de Boxlee et de Fulger[iis] abbatibus et de Couentr[] et de Douor[] prioribus comite Rogero Bigot Hugone Bardulf Willelmo Briwere Roberto filio Rogeri Galfrido de Say Willelmo de Warenne Huberto de Burgo camerario domini regis Radulfo de Plaiz Roberto de Pereponte Ricardo Aguillon Roberto filio eius Waltero de Wancy Philippo de Burneham Waltero de Grantcurt et multis aliis