Charter Document - 00510226

B[artholomeus] dei gratia episcopus Exon[] omnibus fidelibus ad quos presentes littere peruenerint salutem Causam que uertebatur inter ecclesiam Wigorn[] et ecclesiam de Oseneia super ecclesia de Begeberia nobis delegauit dominus papa cognoscendam et iudicio uel concordia terminandam Cum uero in nostra presentia partes instructe comparerent tandem de consilio nostro et sapientum qui aderant et quia dominus papa ad compositionem quam ad iudicium ex litterarum suarum indicio pronior uidebatur uenerabilis frater noster Rogerus Wigorn[] episcopus et Radulfus prior et monachi Wigorn[] ecclesie qui nomine conuentus sui aderant et item Eadwardus abbas et Hardingus prior et canonici qui nomine ecclesie Oseneie uenerant in arbitros compromiserunt sub attestatione ueritatis se eorum subicientes arbitrio Arbitri uero tam pro bono pacis quam pro exequenda uoluntate domini pape decreuerunt ut ecclesia Oseneiensis memoratam ecclesiam de Begeberia cum capellis et omnibus pertinentiis suis et libertatibus et libera administratione et omni integritate tam vicarie quam aliarum rerum ad ipsam pertinentium saluo in omnibus iure dioecesiani episcopi in perpetuum possideat Reddendo ex causa compositionis annuatim Wigorn[] ecclesie lx solidos nomine canonis duobus terminis in festo sancti Michaelis siue infra viii dies xxx solidos in Pascha siue infra viii dies Pasche xxx solidos et eos priori et monachis Wigorn[] ad predictos terminos mittet Preterea Wigorn[] episcopus canonicum quendam ad minus xx annorum nec publica infamia laborantem qui competenter regulam et conuentum sequi possit in ecclesia Oseneie ponet qui pro Wigornensi ecclesia et pro episcopo deo prestet obsequium et obeunte canonico illo episcopus qui pro tempore fuerit alium sub forma prescripta sub rogabit Ita tamen sequens episcopus canonicum ibi ponet si positus a predecessore suo mortuus fuerit Que ut sine fraude intelligantur hoc intellectu sint interpretanda ut ecclesia de Oseneia duos simul predicta de causa positos non habeat canonicos Conuentus eciam Oseneie uniuersi scilicet et singuli pro episcopo Wigorn[] tale suffragium orationum facient in uita et in morte quale fit pro fundatoribus et abbatibus suis Audito autem arbitrio partes utrumque ut spoponderant adquieuerunt et debet hec compositio ex compromisso tam prefati episcopi Wigorn[] quam utriusque ecclesie scripto et sigillo uicissim roborari Quod ut ratum inconcussumque permaneat sigilli nostri impressione roborauimus His testibus Hamel[] Gloecest[] A de Euesham Johanne de Messend[] Willelmo de Lileshell[] abbatibus Roberto de Kinillewrd Rem[] de Selford prioribus Roberto Oxenef[] R de Surreia Simone Wygorn[] archidiaconis Johanne decano Cicestr[] Johanne thesaurario Exon[] Willelmo decano de Lichesfeld[] J cancellario Cicestr[] Magistro Moyse Magistro Siluestro Roberto monacho Magistro Roberto de Ant Magistro Rogero et Turstino canonicis Exon[] Osb[] canonico de Kinillewrd[] Philippo canonico de Derbi Magistro Roberto de Gildeford Nicholao presbitero de Auinton[] Johanne de Lilleshell[] Ascat[] de Messend[] canonicis Hec autem composicio facta est in capitulo Saresb[] coram multis et magnis et prudentibus viris anno Incarnacionis domini mclxxiii