Charter Document - 00461194

Universis sancte ecclesie filiis hoc scriptum visuris vel audituris Magistri Thomas et Ruffinus de Notingham et de Cliveland Archidiaconi commissarii venerabilis patris W[alteri] Dei gratia Ebor[] Archiepiscopi Anglie primatis Salutem in Domino sempiternam Cum os bovis claudi non debeat triturantis nec temporalibus inhumaniter defraudari qui animabus egentibus cibum spiritualem catholicam doctrinam subministrat congruum judicamus atque dignum ut cui curam committimus parochialem ob prerogativam meritorum sic prefecto decens subsidium eidem cohereat temporale ut pondus laboris levius subportetur et facilius sustineat hospitalitatem forinsecum que incumbit Hinc est quod cum Venerabilis Pater memoratus super ordinatione seu taxatione portionis vicarie altaris Sancti Martini in ecclesia prebendali Beverlacensi cum capella Sancte Marie ad idem altare pertinente de consensu Magistri Gilberti de Sancto Leoffardo titulo canonici prebende ejusdem loci cujus eadem altare et capella portiones esse prebendales dinoscuntur et insuper in possessionem et inductionem vicarii ejusdem altaris nobis commiserit nuper totaliter vices suas Portionibus subscriptis in suo valore ponderatis Intelleximus quod in parochia que spectat ad dictum locum cum capella annualia triginta alia et legata sibi relicta et ceteri questus liciti seu proventus quadragesimales et annuales qui certo perceptionis titulo non clauduntur ad viginti marcas extenduntur Item denarius sibi seu suo sacerdoti ipsius vice in dictis altari seu capella celebranti offerendus ad minus valet quinque marcas Nos igitur portiones antedictas ab ejusdem loci vicario qui pro tempore fuerit percipiendas et decem marcas annuas de prebenda Canonici ejusdem per manum Canonici ad Pentecosten et ad festum Sancti Martini [h]yemalis per partes equales ordinantes diffinimus et decernimus inperpetuum persolvendas et ad vicariam dicti altaris cum capella memorata portiones premissas cum integritate decetero inperpetuum continentem ad presentationem dicti Canonici vice Domini Archiepiscopi nobis fungentibus in hac parte nuper factam Dominum Rogerum de Rise capellanum virum providum competenter litteratum et honestum canonice admittimus et actualiter instituimus in premissis et in possessionem ejusdem decernimus auctoritate premissa irrevocabiliter inducendo Decernentes quod ipse et sui successores inperpetuum in dictis locis curam habeant animarum et onus spirituale quod incumbit reverenter subeant suis temporibus et devote Volumus etiam et ordinamus quod ille vicarius et ejusdem successores inperpetuum personaliter et honeste deserviat parochie tam loci matricis [ecclesie] quam capelle idoneorum presbyterorum et clericorum numero condecenti qui etiam cum suis presbyteris intererit in habitu regulari processionibus prebendalis ecclesie diebus Dominicis et festivis Qui etiam fidelitatem et canonicam obedientiam jurabit dicto Canonico coram nobis et idem juramentum ab ejusdem vicarii successoribus canonicis ejusdem loci qui pro tempore fuerint perpetuo prestandum ordinamus Et ut in hoc omnia rata sint et firma presens scriptum in modum cirograffi in dentatum sigillorum nostrorum et etiam Magistri Gilberti de Sancto Leoffardo canonici dicti loci et Domini Rogeri superscripti alternatim appensorum munimine duximus irrevocabiliter roborandum Datum et actum Ebor[] x Kalendas Januarii Anno Domini MCC sexagesimo nono