Charter Document - 00461131
| Charter Number: | 00461131 |
|---|---|
| Cartulary Title: | Memorials of Beverley Minster |
| Charter Language: | Latin |
| Charter Origin: | Religious |
| Charter Type(s): | Mandate |
| Date: | 1306 |
| Date type: | Internal, Calendar, Episcopal |
| Resource Link(s): |
Borthwick Institute - Register 7 (f67r) |
Charter:
Willelmus permissione divina Eboracensis Archiepiscopus Anglie primas Dilectis in Christo filiis Capitulo Beverlacensi Salutem gratiam et benedictionem Cum omnes malitiose infringentes seu perturbantes libertates ecclesie nostre Beati Johannis Beverlacensis tam in aqua de Hull quam alibi pia regum largitione concessas majoris excommunicationis sententia ligatos teneat sanctorum antiquorum patrum consideratione provida promulgata salubriter contra tales ac nonnulli ut intelleximus libertates hujusmodi in aqua de Hull predicta infringere non verentur in animarum suarum periculum nostrum et ecclesie nostre Beverlacensis predicte prejudicium non modicum et gravamen Vobis mandamus firmiter injungentes quatinus omnes hujusmodi nefarios presumptores eorumque auctores et fautores quoscunque pupplice vel occulte Domino nostro Rege Domina Regina eorumque liberis ac nobili principe Gallie duntaxat exceptis canonica monitione premissa singulis diebus Dominicis et aliis solempnibus et festivis tam in prefata nostra Beverlacensi ecclesia quam in capella de Kingston super Hull et alibi ubi videritis expedire campanis pulsatis accensisque candelis astante populi multitudine denuntietis seu per alios faciatis denuntiari in genere per prefatam excommunicationis sententiam dampnabiliter incidisse Inquirentes nihilominus de nominibus eorundem De quibus cum vobis constituerit et denuntiatione facta et ceteris que premittuntur feceritis in hac parte nobis constare faciatis fideliter et distincte per vestras litteras harum seriem continentes cum per ballivum nostrum Beverlacensem vel alium ex parte nostra super hoc fueritis requisiti Valete Datis apud Scroby iij Nonas Junii pontificatus nostri anno primo