Charter Document - 00460002

Johannes Dei gratia Eboracensis Archiepiscopus Anglie Primas Venerabilibus in Christo fratribus dilectis nostris Abbatibus prioribus collegiis archidiaconis officialibus decanis rectoribus vicariis presbiteris et ministris [parochialibus] universis ecclesiarum prelatis per Eboracensem dioecesim et provinciam constitutis Salutem in sanctissimis amplexibus Salvatoris Inter ecclesie pia devotionis opera id in conspectu Altissimi credimus fore gratum quod ad fundationem sustentationem et reparationem ecclesiarum gratiose convertitur que tanquam sancta et salubria in terris habitacula fideles ad orandum recipiunt et ad impetrandum in fide sacramenti altaris quod pro salvatione credentium in ara dominica sacrorum cotidiano ministerio sacerdotum offertur speratam veniam placato Domino de peccatis Cum itaque ecclesia nostra Beverlacensis in qua gloriosi confessoris Johannis venerabiliter conduntur reliquie reparatione indigeat in structura operis sumptuosi Nos structure hujusmodi paternis affectibus prospicere censuimus et spiritualibus quibus possumus amminiculis intimis subvenire Devotionem vestram igitur studiose requirimus et in Domino attentius exhortamur vobis in remissionem peccaminum nihilominus injungentes quatinus cum procuratores prefate ecclesie ad vos venerint pro fidelium elemosinis colligendis eos admittatis benivole eorum negotium parochianis et subditis vestris efficaci compendio exponentes ipsosque parochianos et subditos vestros Dei et nostri intuitu benignius inducatis ut de bonis sibi a Deo collatis ad refectionem et fabricam predicte ecclesie larga conferant subsidia caritatis in quibus eternale premium mereri poterunt acceptius coram Deo Nos autem de ejusdem omnipotentis Dei miti misericordia et gloriose virginis matris sue beatorum apostolorum Petri et Pauli necnon sanctissimi confessoris Willelmi omniumque sanctorum meritis confidentes omnibus parochianis nostris et aliis quorum dyoecesani hunc nostram Indulgentiam ratam habuerint de peccatis suis vere contritis penitentibus et confessis qui juxta exhortationem nostram predictam ad fabricam ejusdem ecclesie de bonis sibi a Deo collatis manus porrexerint adjutrices quadraginta dies de injuncta sibi penitentia Deo propitio misericorditer relaxamus Indulgentias a venerabilibus patribus et coepiscopis nostris quibuscunque catholicis ad id concessas et impostorum concedendas ratas habentes pariter et acceptas Testimonio presentium quas sigilli nostri munimine fecimus roborari Datas apud Burton ix kalendas Aprilis anno Gratie M ducentesimo octogesimo nono et pontificatus nostri quinto