Charter Document - 00450158
| Charter Number: | 00450158 |
|---|---|
| Cartulary Title: | The Cartulary of Burscough Priory |
| Charter Language: | Latin |
| Charter Origin: | Papal |
| Charter Type(s): | Privilege |
| Date: | 1295 |
| Date type: | Internal, Calendar, Feast, Papal |
| Resource Link(s): |
|
Charter:
Bonifacius episcopus servus servorum Dei dilecto filio priori prioratus de Burscogh ordinis sancti Augustini Lich[efeldensis] dioc[esis] salutem et apostolicam benedictionem Exigit tue devocionis integritas quam ad nos et Romanam geris ecclesiam ut votis tuis illis presertim que in divini cultus augmentum cedere noscuntur quantum cum Deo possumus favorabiliter annuamus Nos igitur volentes te ac prioratum tuum predictum favoribus prosequi gracie specialis tuis in hac parte supplicacionibus inclinati sex canonicis in prioratu tuo ordinem sancti Augustini expresse professis quos ad hoc tu vel successores tui in eodem prioratu priores duxeritis nominandos eciam si canonici ipsi fuerint etate minores dum tamen vicesimum annum sue etatis quilibet tunc attigerit ut a quocumque maluerint episcopo catholico graciam et communionem apostolice sedis habente ad omnes eciam sacros ordines promoveri et in eis licite ministrare ac huiusmodi episcopo ut ordines predictos auctoritate nostra eis libere conferre ipsique canonici postquam in presbiteros promoti fuerint ut prefertur si ipsum prioratum per cessionem vel obitum prioris eiusdem pro tempore existentis vacare contigerit in eleccione futuri prioris interesse et vocem plenam habere et si contingat eorum aliquem in priorem eligi huiusmodi eleccioni consentire et confirmacionem eiusdem petere et obtinere licite et libere valeant huiusmodi etatis discreti necnon constitucionibus apostolici ac statutis et consuetudinibus prioratus et ordinis predictorum et aliis in contrarium editis nequaquam obstantibus plenam et liberam auctoritate apostolica tenore presencium concedimus facultatem Nulli ergo omnino hominum liceat hanc paginam nostre concessionis infringere vel eius ausu temerario contraire Si quis autem hoc attemptare presumpserit indignacionem omnipotentis Dei et beatorum Petri et Pauli apostolorum eius se noverit incursurum Dat Rome apud Sanctum Petrum XIIII kal[endas] Decembris pontificatus nostri anno primo
Source (click image below to view full size)
