Charter Document - 00400124

Convenit ita inter venerabilem patrem Willelmum Elyensem episcopum ex una parte et Hugonem abbatem Rameseie ex altera super contentionibus inter eos motis de marisco qui se extendit de Pollynges usque Kekaldre et inde usque Smalaldre et sic usque Echewerebeche linealiter scilicet quod dicti episcopus et abbas concesserunt quod per sacramentum quatuor legalium hominum ex parte ipsius episcopi eligendorum et per sacramentum quatuor legalium hominum ex parte abbatis eligendorum totus predictus mariscis dividatur in duas medietates equales Et cum divisus fuerit predictus mariscus illa tota medietas que jacet versus Benwyk ex una parte de Weremere et similiter versus Ethewerbich ex altera parte mare predicte quiete inperpetuum permaneat predicto episcopo et successoribus suis et ecclesie sue de Ely Et alia medietas que jacet versus Rameseiam remaneat ipsi abbati et successoribus suis et ecclesie sue de Rameseie quiete inperpetuum Ita tamen quod quicquid predictus abbas bona fide dixerit et juraverit et clarum fuerit et proprium tempore contentionis mote primum de predicto marisco remaneat ipsi episcopo simul cum polis et piscariis ipsius episcopi absque hoc quod idem abbas vel successores sui aliquid inde habeant Preterea convenit inter partes prefatas quod si aliquid fuerit occupatum in marisco de Crowelodemore a tempore contentionis mote super marisco predicto inter ecclesias prefatas Elyensem et Ramesiensem emendetur et in pristinum statum reducatur per senescallos predictorum episcopi et abbatis et per visum et considerationem proborum et legalium hominum et omnes transgressiones occasione predicte contentionis hinc inde perpetratas predicti senescalli similiter corrigant et emendent Ad istas autem conventionem et divisionem faciendas et omnia alia secundum predictam formam adimplenda per communem assensum predictorum episcopi et abbatis statutus est dies apud Bemwyk a die Nativitatis Beati Johannis Baptiste in tres septimanas nisi citeriori tempore de consensu utriusque partis dictum negotium competenter secundum quod prenotatum est poterit expediri Et interim neque dictus episcopus nec abbas neque eorum homines in memorato marisco falcabunt vel aliquid inde asportabunt nec manum apponent ad eundem Insuper prefatus episcopus diligentem curam apponet bona fide quod prior et conventus Elyensis hanc conventionem confirmabunt Et si proficere non poterit ratificabitur per cyrographum in curia domini regis Et abbas simili modo faciet ita quod ad procurationem utriusque partis in omnibus provideatur securitati et tranquillitati tam ecclesie Elyensis quam de Rameseie sine fraude et dolo Quod utraque Pars promisit se bona fide procuratarum quantum ad omnia premissa Item dictus episcopus vel homine sui nihil exigere poterunt de cetero in mariscis de Wardeboys preterquam communem pasture tantum in pascendo similiter neque dictus abbas nec homines sui aliquid in mariscis de Sumeresham nisi communem pasture tentum in pascendo In cujus rei testimonium parti presentis scripti in modum cyrographi confecti penes dominum abbatem residenti signa domini Egidii de Argentune et magistri Henrici de Kilkenni sunt appensa Actum apud Crowenest in vigilia Sancte Trinitatis anno gratie millesimo ducentesimo quinquagesimo sexto