Charter Document - 00370182
| Charter Number: | 00370182 |
|---|---|
| Cartulary Title: | Luffield Priory Charters |
| Charter Language: | Latin |
| Charter Origin: | Religious |
| Charter Type(s): | Lease, Agreement |
| Date: | 1424 |
| Date type: | Internal, Calendar, Regnal |
| Resource Link(s): |
|
Charter:
Nouerint vniuersi per presens scriptum indentatum nos Iohannem priorem de Luffelde et eiusdem loci conuentum concessisse tradidisse et ad firmam dimisisse Iohanni Seynt John militi totum manerium nostrum de Monkesbarne iuxta Westpirie in comitatu Northamptone cum omnibus terris pratis pascuis pasturis et omnibus alijs pertinencijs suis excepto semper illo bosco qui vocatur Monkeswode Habendum et tenendum de nobis et successoribus nostris totum predictum manerium cum omnibus pertinencijs suis excepto bosco prenotato prefato Iohanni Seynt John heredibus executoribus et assignatis suis a festo sancti Michaelis archangeli proximo futuro post datum presencium vsque ad finem termini quinquaginta annorum extunc proximorum sequencium et plenarie completorum Tamen dictus Iohannes Seint John habebit ingressum et mensuracionem super warectam terrarum predictarum et super prata eidem warecte spectantes die confeccionis presencium Reddendo inde annuatim nobis prefatis priori et conuentui successoribus vel assignatis nostris triginta solidos bone et legalis monete ad quatuor anni terminos videlicet ad festum annunciacionis beate Marie natiuitatis sancti Iohannis baptiste sancti Michaelis archangeli ad festum Natale domini proxime future post datum presencium Et si predictus redditus triginta solidorum aretro fuerit in parte vel in toto per quindecim dies post aliquod festum festorum predictorum non solutus tunc bene liceat nobis et successoribus nostris vel assignatis in predicto manerio et pertinencijs suis distringere et districciones abducere et retinere quousque nobis de redditu predicto et eius arreragijs plenarie fuerit satisfactum Et si idem redditus triginta solidorum per vnum quarterum anni remansit in parte vel in toto non solutus et super hoc nulla sufficiens districcio ibidem ad distringendum pro redditu sic aretro existente inueniri poterit tunc bene liceat nobis prefatis priori et conuentui ac successoribus nostris dictum manerium cum omnibus pertinencijs suis reintrare et rehabere pacifice in futuro presenti indenture non obstante Et nos dicti prior et conuentus ac successores nostri dictum manerium cum omnibus pertinencijs suis excepto bosco predicto prefato Iohanni Seynt John heredibus executoribus et assignatis suis ad terminum quinquaginta annorum predictorum in forma prenotata contra omnes gentes warantizabimus In cuius rei testimonium tam sigillum nostrum commune quam sigillum dicti Iohannis Seynt John hijs indenturis alternatim fuerunt appensa Datum apud Luffelde vicesimo secundo die mensis Ianuarij anno regni regis Henrici sexti post conquestum secundo
Source (click image below to view full size)
