Charter Document - 00330400
| Charter Number: | 00330400 |
|---|---|
| Cartulary Title: | The Cartulary of the Hospital of St. John the Baptist [Oxford] |
| Charter Language: | Latin |
| Charter Origin: | Religious |
| Charter Type(s): | Settlement |
| Date: | 1320 |
| Date type: | Internal, A.D., Feast |
| Resource Link(s): |
|
Charter:
In dei nomine Amen Acta in ecclesia conuentuali sancte Frideswyde Oxonie die sancti Georgii martiris anno domini MCCC uicesimo comparentibus coram nobis Iohanne Lutterel cancellario Universitatis Oxonie magistro Willelmo de Walecote ecclesie sancti Petri orientalis perpetuo uicario parte actrice ex parte una et fratre Willelmo magistro hospitalis sancti Iohannis extra portam orientalem Oxonie ac fratribus dicti hospitalis parte rea ex altera statimque porrecta peticione dicti magistri Willelmi uicarii super solucione dimidie marce pro minutis decimis infra clausuram dicti hospitalis sibi fideliter facienda ad duos anni terminos uidelicet in festo sancti Thome apostoli tres solidos quatuor denarios et in festo apostolorum Philippi et Iacobi tres solidos quatuor denarios iidem magister et fratres fatebantur se uelle dictam dimidiam marcam ex causa predicta sub forma premissa fideliter soluere in futurum terminis prenotatis Et ut dicto magistro Willelmo uicario plenius caueatur de solucione premissa in forma supradicta fideliter facienda concesserunt dicti magistri et fratres pro se et successoribus suis quod de pensione cuiusdam domus eorundem situate in alto uico in parochia sancti Petri antedicti ex parte boriali quam Iohannes de Coumbe tempore confeccionis presencium inhabitauit dictus magister Willelmus uicarius pro tempore suo percipiat singulis annis dictam dimidiam marcam ab inquilinis seu conductoribus domus prenotate ita tamen quod dicti magister et fratres et eorum successores dicti hospitalis remaneant obligati ad dictam dimidiam marcam terminis suprascriptis persoluendam si ab inquilinis seu conductoribus predicte domus predicto magistro Willelmo uicario non fuerit satisfactum de eadem Nos igitur dictos magistrum et fratres hospitalis predicti de consensu eorundem expresso et iuxta confessionem eorundem coram nobis ut premittitur emissam iudicialiter in dicta dimidia marca ut premittitur annuatim terminis suprascriptis persoluenda et eundem magistrum Willelmum uicarium predictum de consensu suo expresso quod dicta dimidia marca annuatim ut premittitur recipienda tantummodo sit contentus legitime condemnauimus in hiis scriptis iusticia suadente In cuius rei testimonium sigillum offic[ii] Cancellar[ii] Uniuersitatis antedicte presentibus est appensum Datum die et anno supradictis
Source (click image below to view full size)
