Charter Document - 00150060

Universis Christi fidelibus ad quos presens scriptum pervenerit Eustachius Dei gratia episcopus et Ricardus archidiaconus Eliensis salutem in Domino Notum facimus universitati vestre quod causa que vertebatur inter Ricardum priorem de Eya et magistrum Petrum de Litlebur[] personam ecclesie de Dinnevetun[] super quibusdam decimis eiusdem ville de Dinnevetun[] coram nobis de eadem causa ex delegatione domini Innocentis iii summi pontificis cognoscentibus amicabiliter hoc fine quievit Prefatus prior et successores eius percipient omnes decimationes totius dominii iamdicte ville de Dinnevetun[] sive excolat illud dominus ville sumptibus suis et aratris sive dederit ad firmam sive locaverit sive comodaverit Similiter si partem illius dominii vel totum alicui loco religioso conferret in elemosinam aut infeudaret ad militare servitium prior et ecclesia de Eya decimationes integre percipient Si vero dominus eiusdem ville sive ballivus eius aut firmarius partem prefati dominii aut totum rusticis per servile servitium aut aliis per liberum servitium denariorum tradiderint prenominata ecclesia de Dinnevetun[] inde percipiet integre omnes decimationes Idem erit si ille qui partem prefati dominii aut totum per militare servitium receperit rusticis aut aliis tradiderit predicto modo et quod a die huius conpositionis facte de dominico datum fuerit ut dictum est per servile obsequium aut liberum servitium prestationis pecuniarie si iterum redierit in dominicum tunc percipient de eo decimas prior et ecclesia de Eya sicut de alio dominico Preterea si ille quatraginta acre quarum decimationem nominatim idem prior a magistro Petro petebat que antiquitus erant de dominico et ante hanc conpositionem infeudate casu aliquo redierit in dominicum sepedictus prior et ecclesia de Eya tunc inde sicut de alio dominico percipient omnes decimationes Facta est autem hec conpositio coram nobis in ecclesia de Bernewell[] in vigilia Beati Laurentii anno pontificatus domini Innocentii iii summi pontificis v