Charter Document - 00080011
Charter Number: | 00080011 |
---|---|
Cartulary Title: | The Cartulary of Leiston Abbey and Butley Priory Charters |
Charter Language: | Latin |
Charter Origin: | Religious |
Charter Type(s): | Agreement |
Date: | 1193 - 1199 |
Date type: | Assigned |
Resource Link(s): |
|
Charter:
Hec est forma satisfactionis de violentia facta Abbati et canonicis de Leyston per homines Dunewici videlicet quod octo de melioribus eiusdem ville duo clerici et duo ballivi et quatuor alii in presentia domini Cantuariensis Archiepiscopi constituti et literas universitatis eiusdem ville de rati habitione proferentes solempniter iuraverunt quod predicta universitas super dicta violentia iuri pareret ecclesie Quo iuramento prestito et recepto relaxata est sententia interdicti cui auctoritate domini Cantuariensis predicta villa Dunewici erat supposita Licet igitur predicti octo viri se et omnes meliores eiusdem ville a culpa immunes esse constanter assererent tamen ut predicto Abbati et canonicis ad honorem dei et sancte matris ecclesie super violentia predicta satisfaceret ob reverentiam domini Cantuariensis Archiepiscopi et Episcoporum ei assidentium coram eo fideliter promiserunt quod omnes qui predicte violentie dicebantur interesse et predicto Abbati et suis dampna intulisse de omni dampno eidem Abbati et suis illato et aliis etiam Occasione ipsius et suorum ad plenum satisfaciant arbitratu quatuor discretorum virorum ex parte Abbatis et aliorum quatuor ex parte burgensium Dunewici et noni ex parte ipsius Archiepiscopi Si autem qui interfuisse dicebantur ad dampnum istud resarciendum de suo refundere vel noluerint vel non poterint universitas eiusdem ville de communi erario satisfaciet Preterea omnes qui interesse dicebantur nudis pedibus et in laneis ad ipsam abbatiam accedentes super magno altare jurabunt quod de cetero nec eidem abbatie nec alicui ecclesie nec alicui ecclesiastice persone scienter violentiam inferent et quod predictam abbatiam et canonicos ibidem commorantes digna veneratione pervenient et eis debitam et specialem reverentiam exibebunt et de tanto excessu ab ipso Abbate et eo quem dominus Cantuariensis pro eodem est negotio transmissurus penitentiam accipient Quadraginta etiam de melioribus eiusdem ville ad predictam abbatiam accedent iuraturi quod de voluntate eorum nunquam commissa est premissa violentia et quod ipsam ecclesiam et omnem aliam de cetero venerabuntur et sicut decuerit honorabunt predicteque abbatie specialem honorem inpendunt Consequenter tota universitas Dunewici a maiore ad minimum jurabit solempniter quod nec predictam abbatiam nec in aliam ecclesiam violenter insurget nec in aliquam ecclesiasticam personam scienter manus iniciet violentas sed omnem ecclesiam et predictam specialiter honorabit Jurabit etiam omnis illa universitas in eadem solemnitate quod perpetuam fidem et fidelitatem et pacem domino Ricardo Regi Anglie et regno servabit et ipsi Regi Ricardo fideliter serviet contra omnes homines qui vivere et mori poterunt Si autem de illis qui predicto maleficio interesse dicebantur in negotiis suis aliquo recesserint et presentes non fuerint infra octo dies reversionis sue predicto modo satisfacient quod si noluerint universitatis eiusdem ville communionem et societatem amittent Si qui vero preter illos qui satisfecerint predicto Abbati suspecti fuerint oportebit eos vel sicut alii satisfacere vel suam innocentiam purgare Si que autem iniurie de cetero Abbati et suis ab hominibus Dunewici vel illis per predictum Abbatem et suos deinceps irrogantur neutra pars de iniuriis sibi illatis autoritate propria ultionem accipiet set arbitratu duodecim virorum de Leyston et duodecim de Dunewico sibi invicem satisfacient Hec autem omnia concessa sunt et ordinata salvis in omnibus iure ecclesiastico et regia dignitate